今次交流會有好多外國o既民間團體代表o黎o左,不過根據我o既少少觀察,南亞o既朋友數量上比較多o既!今日成個氣氛都好國際feel,亦都帶出世界各國對住WTO普遍都難以招架.
上午一part主要有四個講者發表演說(其實之前仲有o的o架,不過我錯!我遲到!對唔住......),第一個我都唔記得係邊個啦,講o左WTO最新o既談判進展,對佢o既講話印象唔係太深,反而最深刻o既係第二名講者o既演說,講出o左一o的香港民間運動好少有機會面對o既一個問題:國際政治.
第二名講者係一個o係紐西蘭教書o既大學教授(有錯請指正!),佢講o左太平洋島國如何面對WTO浪潮,好似斐濟等島國不斷被列強要求簽署雙邊貿易協定,歐盟迫到佢o地簽,就輪到美國同澳洲迫佢o地簽,島國o既資訊又唔發達,對WTO又認識唔深,糊里糊塗咁就簽o左好多協議,亦都賠上o左島國o既公營部門,生態環境,天然資源等.
有o的島國又面對另外一o的問題,鄰近國家全部加入o左WTO佢(o地)唔加入,變相o係貿易層面上孤立o左呢o的島國,最後佢(o地)都係被迫加入.
聽完之後突然間覺得,WTO比我想像中強,亦比我想像中殘酷.坦白講,呢o的太平洋島國真係成為o左列強o係WTO入面政治角力o既犧牲品,好似無可抵抗任人魚肉,似乎WTO及全球化浪潮o既威力真係強過海嘯!點算好?!
之後第三位講者就係人稱「香港全球化之父」的區龍宇老師!佢主要用香港社會o既角度去剖析點解香港係咁信奉自由市場神話,同埋反映香港人信奉神話背後o既現實環境,非常生動有趣,佢開始演說o個陣歡迎外國o既朋友,竟然將「五湖四海o既兄弟姐妹」字面照譯「brother & sister come from Five Lake Four Sea」......
最後有位菲律賓朋友作出演說,對不起,他演說的時候我已幾乎不支倒地(太早起身了!),唯有留給有心人幫我再續報導......
今日雖然只係出席o左上午一節o既交流會,但都已經帶畀我唔少新視野,期待27日的會議,回來再為大家報導.
廢廢o地o既民間記者小生報導完畢

