立即捐款

中大校友評議會大混亂 主席被彈乜都唔識:投票甩轆、Proxy作廢

中大校友評議會大混亂 主席被彈乜都唔識:投票甩轆、Proxy作廢

圖:今次中大校友評議會周年大會常委選票,成張拎離場都仲得

文:林螳/Chan Melody

今日六月廿六號,萬眾期待既校友評議會周年會員大會,喺火車站對面新起果座BA塔舉行。由於會上選出的三位新評議常委,有機會選任中大校董、監察校方,因此惹來開明派與建制派的校友發起Proxy War動員,爭相收集未能出席的校友proxy選票。會前大家期待住一場龍爭虎鬥,點知竟然甩轆收場!話說原定三點開始投票,點知去到近七點宣佈投票失敗,要續會再搞過?!

投票頹搞

原因係校友事務處安排失當,致投票前後出現大量問題。最離譜莫過於,整個投票竟然連最基本的身份核對程序都無[1],所有人喺門口簽到就可以入場投票,有心人大有機會冒認無出席的校友投票。另外,評議會本身對選票亳不緊張,選票跌喺地都無人理,加上派票之後投票程序長達個三個幾鐘(期間票箱大開,一直任人投票,你亦可攞住張票唔投,甚至拎走),而且票紙亦只係頹印喺半張A4紙上,並無防偽冒或複製記認,甚至連編號都無,分分鐘拎出中環影印番百幾份再返中大都趕得切。投票期間,票箱亦被搬動.....種種求其是但的安排,令投票公正成疑。

過百人無法投票

更嚴重係,不少校友反映本來已登記既proxy票竟然唔見左。為令未能出席的校友都可投票,是次會議設有proxy制度,每個出席校友可另帶五票未能出席校友的proxy票入場,不過這五人就需要預先登記。今日卻發生不少已登記的proxy票在電腦無紀錄情況,唔見左!有校友當場問到失票情況,評議會未能提供數字,在場就有幾十人舉手示意失票,粗略估計,已登記委託代投但未能投票的校友高達過百人。在場的職員表示愛莫能助,「你之後寫信上返來評議會啦。」校友當場投訴安排離譜:原來登記proxy票之後,電腦系統不會發放確認回郵給委任人與受託人,一方面令出席幫手投票的校友未能肯定是否已經正式取得委託;另一方也可能有根本無出席的校友,資料已被盜用來投票自己也不知情。

處理混亂加上無後備計劃,多位校友質疑呢次投票嘅合法性同公正性,校友黃世澤更提出可以司法覆核是次選舉(因為校友評議會係法定組織)。在常委召開緊急會議之後,也無法解決是次問題,又提供兩個模稜兩可的選擇,一是繼續選舉,一是押後。經過大會投票之後,決定是次投票暫停、proxy登記作廢,並且擇日再續。校友憨居居坐左幾粒鐘,不少人都好鼓譟。原本今日個大會除咗投票選常委,仲有表決關於民主女神像以及中大校方「政治中立論」等三個議題。不過因為種種原因,會議連正式投票都未搞到就天黑,無法再續。

被彈唔識程序 主席扮代表十萬校友撐陳茂波

往年只有幾十人去嘅週年會員大會,今次意外地多人,總出席人數為415人,已登記的 proxy票1384張(未計消失於中大電腦系統的票),共1799票;仲有好多城中名人出席,令到一堆記者都堆係BA塔口採訪,壯觀過人大開會。

今次中大校友評議會咁失禮,不少校友都極失望。有校友批評,安排咁差「連中學生的水平都無」。在場多人向評議會主席兼校董劉世鏞查問投票及動議等程序,自吹九四年起就做評議會既劉世鏞口窒窒、又搞錯晒程序,似乎一D都唔熟大會章則喎。亦有人質疑劉世鏞早前在未得到授權之下,私自以評議會主席名義聲稱代表校友,去信立法會支持陳茂波做中大校董的做法不當。劉世鏞死撐自己只係以「個人名義」支持,即場被校友讀出他致立法會的信件,踢爆他以評議會主席之名發信,信中稱評議會「代表全體超過十萬中大校友」,支持陳茂波爭做校董。大會喺六點幾天黑之時,在校友一片不滿聲中散會,另擇吉日重賽。各位未能投票的校友,敬請密切留意事態發展以及投票安排,選任賢能改變圍威喂的腐敗評議會,真正做到監察中文大學校方的功能。

甩皮甩骨 同場加映:
1.校友陳日東大戰校董左丁山
校董香樹輝出左名係「中大護法」,平日用眾多筆名化身係各份報章事無大小撐中大,今次選戰佢非常緊張兼發茅,之前幾日仲同蘋果日報既李八方公開筆戰兼為建制派拉票。喺發問環節時,校友陳日東指左丁山(亦即係護法香樹輝)經常用唔同筆名喺自己專欄攻擊校友周錫輝,陳日東指出作為中大嘅校董,「要反思」咁樣是否公道。

香樹輝即場回應,指呢個環節係討論主席報告事項而唔係左丁山,並且話呢D係轉移話題、人身攻擊,所以不屑回答咁話。

2.楊如虹「期望」論
眾多校友提出各種選舉不公的問題,負責選舉的校友事務處處長楊如虹沒有正面回應,反而指眾多校友不能因為選舉對於自己的「期望」不符,就否定是次選舉,「我地係沒辦法滿足曬你地既期望」。2002年政政系畢業的校友馮家強立即高聲回應,說這不是「期望」問題,是選舉公正的問題。

3.「唔好打字,會整壞d電腦」
會議尾聲,校友謝家祥動議是次選票作廢,有校友聲稱看不到寫在白板上的動議,要求輸入電腦,並在大屏幕上顯示。校友事務處處長楊如虹再次發功,指這座教學大樓新建,未正式開放,設備不足……就在同一時間,提動議的謝校友已準備在電腦中輸入文字。謝校友察覺這尷尬一刻,立即跑回自己的座位。大會於是改口說驚「整壞d電腦」,所以唔打字了。

4.候選人環節主持消失
在週年會員大會正式開始前,有六位常委候選人與會員會面的環節,主持宣佈開始時,肩上竟然掛著手袋,好像「趕住走」似的,到問答環節,竟然沒有主持。結果令台下發問情況相當混亂,有校友一次過提問三個問題,又只准候選人只回答「是」和「否」,完全無人處理會議規則。在場數百校友目瞪口呆。

5. 非法會議
同是政政系畢業的校友李峻嶸指,其實這個會議是非法的,因為根本沒有身份認證,無法肯定與會者的中大校友身份,他表示「我連主席你是否中大校友」都唔知,在場人士和應。

6. 醫院階級論
喺報告事項入邊,評議會主席提到中大將會參建私家醫院,仲講明醫院是「為左中產階級服務」。呢個咁有階級性嘅醫院計劃當然令到全場嘩一聲。睇黎繼香港中立大學之後,中大又可以變香港中產大學。

是次評議會周年大會新聞報導:
蘋果:不滿處理民女手法 數百中大校友出席大會 劉遵義被轟最失敗校長
蘋果:左丁山撐劉遵義貢獻多

相關連結:
Eric Tsui: 史上最胡鬧會議
中大校友評議會再論新民女、文學院統一收生 兼改選三民選委員
扮代表私撐陳茂波 死撐只以個人名義 劉世鏞致立法會信

中大校友評議會網頁

中大校友關注大學發展小組網頁
劉遵義施政監察

香樹輝護主 與李八方筆戰實錄
隔牆有耳:中大校友會 改選掀惡鬥
隔牆有耳:中大校評會改地點開會
香樹輝:中大校友 Proxy War
香樹輝:譴責文革口號
香樹輝:俗語有話九流
香樹輝:大學政治中立

香樹輝護法成功 獲中大頒發院士銜
King Sir:「等咁耐終於等到今日喇!」(設計對白)(原刊《中大學生報》07年4月號)

註:[1]因為早前有會員投訴關於私隱問題,所以今年就不設以身份證核對投票資格