今日我同waterivy去o左"香港專業進修學院"(簡稱港專)度參與佢o地o既一個會議:"青年自僱大聯盟"籌備會.
先交代少少背景先,勞工處近來推出o左"青年自僱計劃",內容是透過專業培訓,讓青年人可以"自僱創業",整個計劃有好多機構承包一齊攪,港專係其中一個.而港專呢?港專係一間有中資背景(佢o地自己講o架!)o既新興進修學院,我有個朋友直頭形容港專係DAB攪o既!
今日(12月2日)三點幾收到waterivy call話有個咁o既會,初頭都唔覺有咩特別,諗住照去啦,睇下作為青年組織成員o既我o地有咩可以同呢班青年人一齊搞.臨入會場前突然"眼眉跳",心諗:呢次會唔知係咪港專攪o架呢?點知真係......
帶住小心眼o既我一入到去就覺唔太尋常,因為邀請信中話"有一班青年自僱學員自發組織大聯盟",但係會場除o左開緊會o既學員外,後排至少有三個港專o既導師,仲有個三四十歲o既西裝友("類manager物體")坐o係最後面壓住個場,情況非比尋常.
我一入到佢o地已經各自介紹緊自己單位o既業務, miss o左最初講理念目標o個一part,不過都唔緊要,會議主持係咁重複話"只係想搞個聯盟聯繫唔同o既單位同埋聯合宣傳",其間主持仲數次詢問大家有冇興趣加入,好似好心急咁.
但係我就唔太同意佢o地o既所謂理念,喂!既然咁有心集合o左一班相同處境o既人,你竟然只係做呢兩樣o野就算數?!你連一o的爭取行動或者係關注行動都冇諗過?!未免太浪費啦!
好彩唔係得我一個咁諗,傾到後尾終於有其他學員忍唔住問"點解要加入",主持迅速反駁,當然我都唔放過呢個機會舉手發言啦,點知其中一個主持見到我想發言就即刻走埋o黎招呼我,嘩!我冇咩咁特別值得你專人招呼掛!仲唔係有古惑?想壓住我唔畀我講?!我當然唔會畀佢得逞啦,簡略交談之後又再舉手發言,我同與會o既朋友講晒我對呢次會o既感覺(浪費)同埋建議(攪爭取/關注行動).
成個會即時崩潰,因為佢o地原本諗住踢完人入會後有一個要學員導師避席o既小組討論,點知我講完意見之後與會者開始思考呢個聯盟有咩可以做得更多,或者係批判成立聯盟o既意義,主辦單位拎唔到大家共識,又踢唔到人入會,呢個時候o個個三四十歲o既"類manager物體"就即時捉o左其中一個會議主持傾密計,傾完密計之後佢o地兩個就輪住講埋晒o的打圓場o既說話,點知越講越多漏洞,又話今日組織大家坐埋一齊主要講錢,又話在商言商先成立個聯盟,甚至講明話爭取唔急得,慢慢o黎,暫時做住"聯繫唔同o既單位同埋聯合宣傳"先,結果都係取唔到共識,要下次會議再傾.
呢次會議簡直離譜,亦都體驗到DAB o既做o野方式,有幾個point簡直不吐不快:
1)點解不斷重複踢人入會?係咪想一開始就踢人入會,等所有與會者"走唔甩"?咁同搏大霧有咩分別?
2)點解要避談目標理念?係咪唔見得光?!
3)小組討論點解唔畀導師坐埋入去?係咪驚我o地洞察到佢o既背後動機,繼而反抗?
4)點解會有專人服侍我?係咪怕我亂講o野?
5)點解要成日講在商言商?係咪希望將青年o既注意力集中講錢,刻意淡化我o既"團結爭取言論"?
會後同o的列席o既社工導師傾番,原來我o地都有相同o既感覺:"好有政治味道,唔太正常,似乎背後有動機"好彩都有人感覺得到呢次會議發生咩事.最後我打算長期跟進呢單o野,waterivy怕下次入唔到去,反而我認為一定入到,因為如果港專唔畀我參與下次會議,咁就證明佢o地有陰謀!!不過就最怕港專刻意唔通知我開會o者!
民間記者: 小生.毛出沒主意
與作者討論請到