立即捐款

寶礦力的正面力量

寶礦力的正面力量

從寶礦力呢單嘢睇到,好多時正面力量係會大過負面力量。你呼籲杯葛TVB的廣告商品,畀人感覺係負面,呢個都唔緊要,最重要係好難做到,因為TVB廣告商品實在太多,涵蓋範圍太大,真係要全部杯葛,好多平民會覺得生活唔到咁滯,而且杯葛必須人多兼長時間,人唔夠多冇用,人多杯葛一兩次冇用,但要人多又持續三個月去杯葛已經非常之難。

但用正面角度去講,感覺就會好唔同,例如話畀啲品牌聽,唔落TVB廣告,會好似寶礦力咁,突然紅起嚟兼賣斷市,好多網民會自發幫你宣傳(例如一眾插畫師),威力好大。又好似活色生香安全套,即使你覺得佢抽水,冇所謂,賣廣告係想多啲人知,抽水亦都係想多啲人知,咁佢開宗明義全段係反TVB,佢有膽咁抽,我點解冇膽幫佢宣傳呢?咁樣就令一個比較少人識嘅安全套牌子,一炮而紅,呢個就係正面力量。

正面力量嘅最終目的,就係令到好多商業品牌改觀,開始認為TVB呢啲不思進取食老本兼維穩去危害社會核心價值嘅媒體已經唔值收你咁貴。我唔係單單同你講良心,我同你講錢,究竟TVB收你咁多錢有乜效果?會睇嘅大部分係新移民或冇乜其他娛樂可揀嘅大媽同基層,唔係歧視佢哋,客觀事實係佢哋冇咁使得起錢,咁你投放咁多錢去賣TVB廣告,結果reach到一班唔多買嘢嘅人,一啲都唔值。相反,唔賣TVB,賣吓去網絡,只要品牌形象正氣,網民樂意自發幫手宣傳,咁樣落去,個風氣就有機會變。

抛磚引玉,集思廣益,大家不妨諗吓呢個方向。