立即捐款

人唔笑狗都吠

人唔笑狗都吠

是日,中華廠商聯合會永遠名譽會長黃友嘉表示,香港經濟本已放緩,因修例引發的連串示威活動,進一步影響零售和消費信心及意欲,有可能令經濟更進一步放緩,並認為隨著暫緩修例,問題經已解決,反問「再落去嗰啲遊行究竟目的何在?」

真係人唔笑狗都吠。中華廠商會喺6月9日100萬人大遊行翌日表示,該會支持修例以堵塞現行條文的漏洞,維護香港公平、公正、公義的核心價值,構建更完善的法治環境。

咁通過送中條例,係咪對經濟冇影響呀?所有外國商會都出晒聲,話好憂慮,一定好大影響,大家話咗會考慮撤資,會改變香港嘅地位,美國也表明極可能修訂香港關係法,取消香港獨立關稅區地位。呢啲舉動對經濟嘅影響,唔大過咁多日嘅示威遊行?唔止大過,係大好多好多好多,咁中華廠商會,點解未驚過呀?點解唔擔心呀?點解繼續支持修例呀?點解要全香港人陪葬呀?點解唔諗吓「再推落去究竟目的何在」呀?

最好笑係,原本你呢啲商會,係表示過憂慮,然後林鄭政府將一啲商業罪行剔除咗,你哋即刻話表示歡迎仲要企硬支持。咁即係咩態度?即係你哋大商家佬有著數,唔理其他騰騰震嘅小商家小市民,為咗你哋一少撮權勢利益,不惜將全香港人捆綁掉落海生葬。

到咗依家,民怨一發不可收拾,你哋中華廠商會就係最大幫兇之一。依家成日遊行,遊親都咁多人,仲成日發生衝突,人都犧牲了四個,還不計那些年輕人的前途盡毀,就係因為要推倒你呢個商會原本都擔憂嘅送中條例,你今日好意思話遊行影響經濟?你當初如果拒絕支持,強硬表態,咪冇今日囉,一切係因果,係咪?

所以當聽到你咁講,好多人真係好開心。原來你驚經濟放緩呀?但係當日外資撤資你唔驚喎。咁好啦,當日你將全香港人推落火坑,香港人唔知幾生修到奇蹟地冇跌落去,依家你叫香港人顧住你啲商家利益唔好遊行示威?你自己問吓個大腦,講唔講得通啦。目的何在?其中一個目的係對你哋呢啲商家復仇,支持送中條例那一刻你諗住要香港人攬住一齊死架,咁不如攬埋你哋一齊死!