政經

週一 2015-02-16 草根行動媒體

新聞解毒短打：屈神明一餐戇居政策新聞博人睇唔到？

A A A

文：無眼睇小市民

今日方向報真係睇到人呆左，頭版、第二版都係講方向報去求籤，連「貪曾案」、「曾蔭權」、「梁振英」都有得求？乜要求籤唔係要親身誠心去求才會準嘅咩？

方向報又找個居士解話，講嘅野就同方向報一路講開嘅野一樣，都係咩佔領搞差治安，又話梁振英有中吉，所以政策會落實，民望會升，真係幫梁振英幫到出晒面喎......

跟住曾蔭權上吉，無端端又拉埋「貪曾案」講，你話係「求得清白」或和「甩身放生」都得架啦，咁方向報就話係暗示「甩身」？

咁樣找神明過橋，真係大吉利是，因住有報應呀！仲要放在頭兩版？作為基層市民，關我乜事呀？

反而見到最尾最角落位的一篇「病危早領強積金」報導，我真係好驚我病到無錢醫而死，強積金都帶埋落棺材囉！不過原來所謂的「早領」係要末期病救唔番得番一年命都無先拎得？！都係得個估，咁我一年後未死又點？一個月就死左又點？好多長期病都要洗好多錢醫架喎，點解唔可以一次過俾埋？

咁戇居的政策，就算如方向報所言畀梁振英落實到又有鬼用咩！

真心懷疑方向報都知大家會有怒氣，「用心良苦」大作故仔，等大家焦點被轉晒去閙政府以外的其他人，呢單新聞唔多覺，咪無人閙囉！

真係點都無可能再信方向報係「基層立場報紙」囉！