六月七日凌晨,有狂徒在灣仔向衝鋒車投擲汽油彈。在如此敏感的日子做這樣敏感的事,究竟是誰幹的?
有小部分人條件反射,沒腦可用,一定屈落「反送中」的支持者身上。不過,這個可能性真係極低。首先,面對逃犯條例修訂這個黑白如此分明的議題,發展到今日,已接近全民反對,只要智力正常,自可知道要企哪一邊。既然這些人都智力正常,都知道六月九日遊行人數一定極多兼且有增無減(有四個我從來冇諗過會上街嘅人都話星期日要出嚟),自然也知道,擲個汽油彈,只會把大好局勢破壞甚至扭轉,試問這些人又怎會這麼智障?
把汽油彈擲向警車,即挑戰警方,對阻止修例有什麼用?警察除咗聽命,在社會有什麼影響力?這樣擲,丁點作用都沒有。別忘記,香港擲汽油彈的專家,是工聯會,他們六七暴動是擲了很多汽油彈,還燒死了商台主持人林彬,那結果怎樣?就是全港市民反工聯會,支持港英警察,對這批愛國者一點同情也沒有。這是大部分香港人都耳熟能詳的事蹟,反修例的市民更是經常引用,試問這個陣營的人有沒有這麼蠢,既有工聯會珠玉在前,還去做一件扭轉民意的蠢事?
當然,反送中的人當中,會否有極小部分智力不正常,同時又有膽有車有計劃去做一件智力正常的事?機會是有的,或然率大概跟中共做好事一樣。
由於反送中的必有正常智力,所以新聞一出,大家一面倒認為,這是為減少遊行人數而做的,甚至想到電影《十年》的單元「浮瓜」——自導自演。這個推測在這個時勢也不無道理的。首先,行兇者駕的是黑色車(據推測是平治),全身黑衣(還好像穿了褸),凌晨三點出動……無論行裝和手法,都太像江湖人士了。又別忘了,梁振英上場後,江湖人士都高調起來,當年梁振英就以「江湖飯局」開展其特首新局,及後在天水圍落區,又見到一班貌似社團人士惡形惡相的人物撐場,雨傘運動時旺角區就出現大批貎似綠林好漢「協助」警方清場,近年不少被傳是社團人士的家屬更高調發表愛國論,更高調撐警隊執法。再看看案件的短片,有膽用汽油彈而且事後那麼鎮定識飛車離去嘅,電影也有得睇,多數是「收錢做嘢」的。
咁當然,如果係黑幫做,收邊個錢,就講唔埋嘅。就喺今年四月,尖沙咀山林道兩批為數約20人男子在街上起哄叫囂,警方反黑組探員巡經上前驅散,期間,有人挑釁警隊權威阻攔警員。之後,警方為了打擊尖沙咀黑幫氣焰,不斷落區查牌。咁依家黑幫咁愛國,話唔定覺得警察咁唔畀面國家,竟然阻住佢哋搵食愛國,因而作出挑釁報復,係極有可能。咁睇,成件事又唔關六九遊行事了。
不過得意嘅係,架車事後駛上天橋,條橋應該係轉落告士打道嘅,嗰度一定有道路監察系統(即係朝早睇新聞那些塞車片),成條路大把CAM,冇理由到依家都起唔到架車嘅底喎!咩型號,咩車牌(就算假都好),之後過海定點,都一定追縱得到掛,唔通咁啱唔見咗段片?差人做嘢唔使我教,只係差人做嘢一向好快捷架喎。
好喇,至於有啲人話,係中共做嘅,係「浮瓜」嘅劇本。我就堅決唔信,因為大家太睇少中共,中共係唔會咁樣做嘢嘅。如果係中共做,衝鋒車上嘅警察一定冇命,因為按照六四嘅邏輯,死幾個警察,平息咗反對派嘅抗爭,換來香港三十年繁榮,係正確無誤嘅果斷措施。呢幾個警察犧牲咗,我們這刻都會很憤怒,但過幾年就可以放低,向前看,覺得他們像六四犧牲者般「死得好」了。因此,我真心相信中共喺成件事係無辜嘅。
至於件事會唔會影響大家嘅遊行意欲?喺八九六四時,香港發起了全港罷工罷市罷課大遊行,但因為「碧街事變」,即有人在三罷前挑起爭端,搞事破壞治安,加上港英政府當時收到可靠情報,指中共有大批人入境搞事,最後三罷遊行取消了。不過,那是沒有手提電話,沒有網絡,沒有車CAM,沒有社交網站的年代,喺當年我哋真係唔知外面發生咩事,只能從片面的電視畫面和報紙報道知個大概。恐懼源於無知,所以當年恐懼係正常嘅,但今日呢?資訊如此發達,我們還是否像三十年前那樣欠缺資訊因而恐懼呢?
至少,我一定不會。六月九日,街上見。

