任何一個正常人,睇見星期日嘅元朗恐襲,一班白衣人,拿着武器,隨機襲擊市民,當中有學生、女人、記者甚至孕婦,個個打到皮開肉爛,大部份喺醫院有記錄,其中更有知名人士柳俊江。有片,有可確認嘅傷勢,有大量人證物證,如果呢啲白衣人唔係暴徒,請問仲可以係咩?
有啲人仲話啲示威者係暴徒。請問示威者有冇無差別襲擊過市民?唔單止冇,佢哋仲不斷幫助無辜捲入嘅市民,幫助被那些肆意狂妄嘅防暴警察嚇到震晒嘅老弱婦孺。相比下,叫那些白衣人做暴徒,已經係最低層次,正確嚟講佢哋直頭係恐怖份子。
咁清楚嘅結論,由張建宗講出,已經算係呢件事中最似人嘅說話,卻竟然被十八鄉、八鄉、廈村鄉、屏山鄉、錦田鄉及新田鄉鄉事委員會,聯合聲明強烈譴責。佢哋嘅理由係:事發經過及原因尚待警方調查,在調查未有結果前,張建宗身為特區政府高級官員,貿然以暴徒標籤部分人士,嚴重誤導市民,亦無助於緩和元朗社區近日的緊張氣氛。
真係好好笑。首先,你即係認白衣人係你哋嘅人,係咪?第二,當年我喺電視,見到葉繼歡率眾以AK47橫掃觀塘物話街五間金行嘅新聞,全城都叫呢啲人做「悍匪」,唔見得有個悍匪協會走出嚟話「事發經過及原因尚待警方調查,大家唔好叫呢啲人做悍匪呀」。咁調返轉,你都未查清楚,你做咩叫衝擊立法會塊玻璃嘅人做「暴徒」呀?我叫你成立獨立調查委員會查清楚,你又唔肯,一口咬定就係暴徒,你唔去譴責呢啲標籤嘅人?
成件反送中發展到今日,發現香港有兩大腫瘤:一個係警察體制,一個係鄉黑。太平無事嘅時後,兩大腫瘤各自發展,越來越腫大但無人留意無人理,去到今日,兩大腫瘤二合為一,成個爆咗,癌細胞擴散,傷害咗幾多無辜?去到咁,香港已經返唔到轉頭,重劑化療必傷及元氣,唔醫就Cancer末期死亡!

