中大校董會既由政府委任，在重要關頭飲水思源、投桃報李，一方面締造官學和諧，廣結善緣；另一方面也向年青人身教做人處世、辨別莊閒、識Do襟撈之道，更一盡照妖鏡的社會功能添。問題是邊個係妖，或進深一層，邊個抵妖呢？
唐司長是不是、扺不扺妖？
早已踏入英年，但尚未完成那句四字詞語的唐司長(邊句問長毛)，至於幾時做埋佢所講嘅人生不能逃避的兩件事，我諗除咗量鎮的那個英之外，普通市民關注不多。至於唐寶寶佢抵唔抵獎、憑咩攞獎？我又咁睇噃，雖然佢嘅乞人憎指數達標有突，但起碼從現時可見的跡象顯示，以他的智力、手段甚或企圖心，都未必足以帶領香港做錯一啲好大的決定，至於做到鬼之後是否迷人，那又是另一回事。雖然，董先生已經深深地教訓了我們拖延卸膊唔掂唔好，但那位小人得志，將國歌當口哨吹、有鑊卸有功搶、機關算盡、身家薄削、心虛氣虧、既要討好阿爺，又要信人唔過、有名憎恨人地靠著祖蔭而當權的，禍港效能豈在腳痛爺爺之下？在不久將來的政治現實中，我寧願忍受那個在香港dep自己紅酒傻笑的，總好過啃嗰件成日返大陸掹阿爺褲腳(乃)表叔茅台杯底嘅精英，你話減害算唔算貢獻？要妖不如妖那個唔俾你揀的局和設局之人。
劉遵義是不是、扺不扺妖？
單看名字，遵禮行義，值得表揚之至。可見劉父知書識墨，亦對子嗣有所要求。至於劉君後來認了甚麼作父，以誰人的要求作為行事為人宗旨，那就不得而知，總之有不少人提起他就揸住中指。至於劉先生申論示威人士非中大員生，言下之意，即謂中大的學位，是中大私產，中大頒帽扑嘢，係我地社團私人事務，唔關華人與狗的事？我也讀過中大，經濟學老師教過我地知有樣嘢叫做公共財富，有樣嘢叫做外部效益，照睇經濟佬出身的劉某人都應該知道大學攞咗政府資源，大學動見冠瞻，要向社會交代個可？李國章一手隊冧中大教職員士氣，劉遵義大興破相土木、樹眾敵、激民憤，唔怪得中大要由搞內科出身的沈醫生執手尾。至於人地唔嘈我地點解要嘈，經由校長一問，當堂哲理結構層次深咗好多，果然係讀過書。但政府廣告唔係話俾人非禮唔好啞忍嫁咩？除非校長話我自願嫁啦。不過係校長你自願咋噃。
其他三間簽過香油的大學是不是、扺不扺妖？
老實說，巴結歸邊，政治賭局一場而已。以中大今日的江湖地位，又何須急於一時？必經之惡，何不等到塵埃落定，再行錦上添花，咪當交佗地囉。做小生意嘅，人地成盤桔搬到上門，有得唔封利市咩？但駛唔駛咁快瞓哂身呢？老實說，榮博發行辨公室有如停車場內的洗車檔，互惠互利啫。有怪只有怪整體社會民智落後，觀念仍然停留在官大學問大，相信高學歷等同、甚至保障了辦事能力和道德良心。寧可將揀擇的煩惱、揀錯的憂慮一拼外判交由學歷評審架構代勞，然後心安理得，死都死得眼閉啲。最應領取榮博者，莫如建構勞力者治於人這種順民品格的教育制度。劉校長吖，佢係呢方面貢獻良多，既然佢連基本經濟名詞都搞唔掂，掛乜鬼經濟博士吖，榮博啱佢啦，榮博唔駛搏嫁咩？
其他一齊攞榮博人士，條氣好唔順的畢業生、家長、校友是不是、扺不扺妖？
每逢示威場合，必有主辦單位、參加者、觀眾埋怨有人搞串party。既得利益集團固然勁玩程序威嚴、聲東擊西，可憐的是蟻民喪buy。似乎只要衣香繽影，喜氣洋洋，句句吉利，老爺就會從此長命百歲，少爺就會一世飛黄騰達，少奶就會立刻連生貴子。上樑不正下樑歪，有獻媚討好的校董會，就會有急於捍衛建制顏面利益，見奶喊娘見官叩拜的青出於藍。加上那位當年豪情壯語話要盡所有方法斷你米路的校友，中大的中國化，指日可待。
至於最有資格判斷中大冧唐寶寶呢鋪利弊功過，是bonus還是boneless的，只有一位校董。他就是全港至尊英文名師陳克勤議員，不信？你叫他讀俾你聽聽。