之前看過圓子溫嘅《愛之剝脫》，而今年香港電影節又有長篇日本電影，比起《愛之剝脫》仲要長，呢個引起我嘅注意。我之前無看過瀨瀨敬久嘅電影，但知道佢係其中一個帶領粉红新浪潮嘅大師，對當年沒有揀《東京性愛死》感到後悔（註一）。今年雖然睇到《天堂物語》（亦稱《天堂故事》），但性質同《東京性愛死》無可比較。
因為兩片性質相差很遠，所以，選片時還要考慮到另外因素，一個係柏林電影節後得 FIPRESCI 獎，第二係若松孝二與熊切和嘉嘅美言（雖然多少係畀面派對），第三係故事復仇性質適合自己口味，有呢三個因素我先決定將本片訂為本年電影節重要目標。
瀨瀨敬久
我特意搵《感染列島》去了解瀨瀨敬久一點風格。感染列島係好商業化嘅作品（雖然都有上康城影展），要表現佢嘅粉紅系本領亦唔適合。我搵《感染列島》嘅原因只係佢周街都有得賣（註二），而《東京性愛死》就唔係。我承認呢方面我係懶，但我無咁多心機去專門研究一個導演。《感染列島》講流感瘟疫襲擊日本。係公衛技術層面，套片完全無說服力，我從來都無見過 WHO 會派人員直接指揮地區醫院。呢個係缺點，但唔傷害整套片要講嘅嘢，重點其實有兩個，一個是人類面對自然應有嘅謙卑，另一個令我更為困擾，就是「神の制裁」嘅性質。兩個題目其實都是同一個問題，但「神の制裁」遠遠比「天譴」更為困擾，因為「天譴」嗰「天」並唔必然指神，亦可以指大自然（日本傳統中，尤其喺神道教，「神」同「大自然」無好似西方分得咁清楚），由大自然去懲罰人類，因為人類總是不能學會謙卑，我完全唔會感到困擾。但由神去制裁人類，我感到十分之困擾，因為我好抗拒有個所謂嘅神去干擾人類嘅事。我唔解決呢個問題，將佢帶過去《天堂物語》。
《感染列島》Youtube 宣傳片。廣告標題係：「神に裁かれるのは、人間か？ウィルスか？」
天堂物語
我入戲院前只當呢套片係描寫仇恨嘅電影，完全將「天堂」忘記得一干二淨。套片一開始就講一隻異物／怪獸同村落嘅故仔（這個劇透不算嚴重），隻怪獸被村民排擠，村民祈求上帝消滅隻怪獸，但上帝只係冷眼旁觀，乜都無做。村民決定自行驅走怪獸，但咁樣激嬲咗隻怪獸，四出咬人，被咬嘅人結果變成怪獸，於是成整村都充滿怪獸。呢個故仔同廣告標語「世界が憎しみで 壊れてしまう前に。」十分相符，觀眾就去等待主線故仔點樣崩壞。
人物
主線主角有サト（父母被害）、トモキ（妻女被害）與及ミツオ（未成年兇手），支線主角有カイジマ（殺手兼警員）、カナ（イジマ賠錢對象），重要次角有恭子（ミツオ服刑後嘅養母）、タエ（聽障女子）、ハルキ（カイジマ之子），作為一套電影有仲多重要角色並唔奇怪，但係套片對佢地每個人都花好長時間描述佢地背景，的確辛苦。導演個心意係好，我都想對佢地每個人都認識得多少少，不過手法上應該要靈活少少。套片頭一個鐘係笑位同驚險位，但之後就不斷咁沉重起嚟，問題係，其實人物介紹去到第三個鐘（第六節：聖誕禮物）先至完，我覺得唔需要一直都咁沉重攞，同埋應該加強主線主角與支線主角嘅互動，唔好真係發展到兩個線咁。人物介紹過程嚴重缺少氣氛變換，雖然未入場就知套片超過四個半鐘，但仍然好難要求觀眾維持耐性，中場休息時可以反映到。
崩壞
其實復仇片嘅方程式都係「冤冤相報」，朴贊郁嘅《復仇》都係一樣，所以個問題只係演劇點樣將人物串連堆一齊，與及出現一個點樣嘅（崩壞）效果。其實當介紹完人物之後，觀眾就好容易估到「冤冤相報」係點樣觸發，完全無推理成份，好白。餘下就是編劇想「預咗要死」嘅人點死法，呢個我留番畀大家自行品嘗。我評價個效果係比得上朴贊郁嘅復仇。不過，好戲在後頭。
第九章：天堂物語
我插個花，講下北野武嘅純愛電影《偶斷絲連》。松本（西島秀俊飾）帶住失心瘋嘅佐和子（菅野美穗飾）不斷地流浪，不斷又不斷，好像有一段連續十分鐘都無對白，只係一味行。天堂物語第九章副題「天堂物語」就有呢個感覺，大仇已報，但報到仇又點呢？佢們真係可以「在天堂相聚」嗎？天堂無語並無《偶斷絲連》果類長時間流浪（已經四個小時啦，導演唔需要再咁樣虐待觀眾），但整個失落感卻可以發揮出嚟。
本段有一短幕發生在進入天堂之前，全幕黑底白字，「你是否相信有神嗎？」，我在《感染列島》丟下嘅問題，一下了又回來了，好似有個閃電打過來了一樣。呢個問題核心並唔係真係有無神，而係有乜野力量，可以令人類放下執着與自大：這呢類執着與自大令人類自招災難嘅。呢方面，我對瀨瀨敬久佩服到不得了，即使佢無為問題提出答案（整套戲都好白了，唔可以連呢個都要套片去講）。
片末主題曲係將之前各章故事首角サト嘅心路歷情再次描寫出嚟，個故仔如果只係講報仇崩壞，咁就真係淺白到唔可以再白。天堂物語呢一章有仲咁野要觀眾去唸？我唸，最少觀眾感該去思考呢個崩壞嘅根源係邊度，係唔係只講「唔好執着」就得，同埋有乜野倫理力量可以阻止。
才能
其實我幾仲鐘呢套片嘅取鏡效果，例如好似真係有一大舊石掟過嚟，嚇到我想閃開。我覺得瀨瀨敬久於好多方面嘅控制有很多天份，就係搵編劇效果唔理想。我唔敢講係唔係編劇人選出問題，因為要編四個半鐘本事都談何容易。其實如果同一個節奏唔變，一個鐘甚至再多少少都可以忍受。本片有極度過人嘅反思之處，亦有令觀眾難忍之處，我會話瀨瀨敬久係未琢磨嘅天才。
我睇嘅係滿座場次。呢套戲睇完後，好少觀眾拍掌。
－－
註解：
一） 電影節會簡介每一套片，同埋會畀個譯名，但係好多時都會寫到好誇張，寫到好似連豬都識飛咁，改個好閃人嘅名，令讀者有時冷不提防，有時又過度心防，有時套片其實有欣嘗價值，但係簡介卻令觀眾有不相干期望。如果套片叫《東京性死愛》而唔係《東京性愛死》，稍為自制一下，其實已經好好多，減少我嘅過度心防。
二） 完全係幸運成份，我事先並唔知道《感染列島》同本劇有咁重大嘅交集。不過呢一點的確有過人之處，因為天罰論有助增加人類面對自然應有嘅謙卑，呢一點並唔係常識，只有好少文人又留意到又勇於去講。