圖:和平佔中
前日「被捕支援組」係旺角前線開咪,叫大家send個人資料去熱線,有人大叫「你係咪鬼呀,點解要比資料你」、「咩人黎架,識唔識野架」、「我地係黎打仗,唔係被捕啊」。
我幫手解釋下,「佔中秘書處」籌備左「法律支援團隊」一年,有班義務律師侯命,包括事務律師同大律師。至於係烽火前線負責問被捕者拎名同身份證個堆義工,大多會著住件綠色 tee ,寫住「被捕支援」,即係收集資料比律師去幫大家既。
發短訊去熱線,重要在於查到你既資料,律師就會易處理好多,你想像下,當你比人打穿個頭,流晒血咁,被捕支援行到埋去問你叫咩名,你都痛到可能只係講到「陳x文」,但如果打左個底有短訊,支援組可以搵到你個名叫「陳大文 chan tai man」。
所以,如果在場有人極度不滿「大會」,不需要律師幫忙,或者覺得自己係衝上前但完全唔會有機會被捕,咁是 ok 的,可以不予理會。
但如果大家還是要幫忙,咁就要記住被捕支援講乜野,包括:唔好同警察吹水、唔好亂簽文件、唔好講自己做過乜野、記住要拎文件副本,記住永遠一句「我無野講」,好好記住,咁就可以減少律師工作量。
事實上,義務律師團係做到人都癲,通宵當值,逐間差館去,又要去埋醫院,有時人太多資料唔齊仲難搞。差佬鍾意玩野,律師有時要等好耐先見到被捕者,仲要排住隊見。見完被捕者,搞完手續,比完意見,自己又要返律師樓做自己野。
至於「被捕支援組」,要勁勇敢走去前線問人拎名,警棍就係義工隔離係禁揮,有義工按章工作黎幫手,又有一直罷課既同學全力協助。
要懂得感謝大家既付出,唔好一句話人地係鬼咁涼薄,律師團義務幫每一位佔領者,唔係奉旨的,希望大家清楚明白,做人有時唔好太涼薄。
我不是法律組,只是有時看不過眼,要互相了解,守望相助,大家辛苦了。

