最近因為逃犯條例嘅事，去過幾次冇乜事都唔會去嘅金鐘，亦為此寫咗幾篇同足球冇關嘅文章放咗喺度。可能有人會覺得，一個足球專頁冇啦啦講政治，大事大非係咪想搏like呀？好老實講，整體like其實冇多到，反而unlike/unfollow嘅就每日keep住幾個，所以真係吃力不討好。
又好老實講，大事大非嘅日子，我真係冇乜心機再去follow啲足球新聞，相反逃犯條例嘅新聞已經佔據咗我9成時間，至少我知道呢啲事先係影響緊我嘅生活同未來，而唔係邊個邊個轉會、邊個邊個離隊。
又再好老實講，我都好怕畀人錯覺，以為我借呢啲事去抽水。講真，抽水人人都識，抽得靚嘅亦都有大把專頁做到，都唔使出動我呢啲同政治冇關嘅專頁，但點解我都仲要講完又講、寫完又寫，因為我知道作為一個有幾萬人嘅專頁，我係有少少責任去做啲嘢幫返自己住嘅地方。
記得有一晚，inbox收到有位讀者msg，佢同我講：「你可唔可以用下你嘅力量，叫多啲人登記做選民？」其實我第一個反應係：「我何得何能號召他人？」再者：「一個講足球嘅專頁又可以做得啲咩？」，但諗深一層，其實我唔應該係諗呢件事關唔關於足球事，而係呢一件係咪正確需要做嘅事。
正確做嘅事，無論你係咩立場、咩背景、咩身世，都要做㗎啦，咁登記做選民又或者關注逃犯條例呢啲事，係需要同埋正確㗎喎，唔好話係球迷，作為香港人係一定要關注。
明白，你可以話要睇政治嘢唔使睇我嘅專頁，外間大把專頁可以講。我絕對明白，但係作為香港人，甚至作為一個有少少影響力嘅專頁，我係有責任去為我哋嘅地方做少少嘢，那怕只係做到好少嘢或者微不足道，總之係正確嘅事就去做咪得囉，使咩理人點睇，我又唔係要上大陸搵食，怕咩畀人批鬥？更何況真係冇呢啲情況，最多都係unlike之嘛。
我其實只係一個識寫少少嘢嘅打壞書生，除咗我嘅職業之外，好大程度上同大家一樣只係一個好普通嘅香港人，我同大家一樣都經歷同面對緊呢場抗爭，利迷身上地講一句：其實you will never walk alone。而我都好想喺自己崗位上做啲嘢去改變呢個情況，就算我做唔到衝最前，幕後做到少少嘢都好呀？我唔係想講自己幾偉大、為呢件事有幾出力，何況講功勞，我呢啲鍵盤戰士真係不值一提，但係我同大家一樣都係一樣，都想幫得幾多得幾多。
再一次老實講，你估我真係好想寫呢啲文？有足球唔講返足球？日日睇住呢啲新聞唔會攰？攰，全香港人都一樣攰，但係你冇得因為攰而唔理，呢度係你屋企呀，你唔理仲有邊個理呀？你支持一隊波，隊波有咩事你都唔會置之不理啦，道理都係一樣。
我知道呢度有同我一樣信念嘅人，亦知道有同我相反理念嘅人，明白有人討論有人unlike 嘅原因，但對於我，我認為自己唔可以喺呢段時間當冇事發生，繼續同大家傾波經、寫足球文，呢啲唔應該係而段時間去做。
其實我都唔知可以講啲乜，我只係覺得而家好無力，無力在於文又寫咗、示威又示咗，到底之後可以做咩?或又或者仲可以做咩？到底結果係點？我都唔知，我唯一知道嘅係，殺到嚟呢度仲可以就咁放棄？而家放棄，就乜都完㗎喇！
係老土，但啱用嘛。
所以而一刻踢到筋皮力盡、踢到開始唔知自己踢緊乜，你都願意咬緊牙關踢落去，都係因為在意啫，可能就係因為呢一下咬住唔放而有轉機呢？唔知，我都唔知仲可以做啲咩，唯有講聲，各位，繼續加油。