除左對曾俊華有善治、比香港人休息下的期望，有另一個支持曾俊華的理由，就係 Anyone but Carrie Lam。不過我個人真係有個問題想問問。各位希望民主派選委支持曾俊華的朋友，你地知唔知道而家個選舉制度係點？因為理論上，如果林鄭得到阿爺祝福，成功箍到600票，咁民主300票其實投唔投曾俊華，都影響唔到大局。所以民主300票對曾俊華有用，只有係林鄭唔夠票的情況下有用。
再講白D，而家有1200票，要過600先當選。如果林鄭得票多過600，即使曾俊華全取民主300票，都唔會多過林鄭。即係話，只有係林鄭根本選唔到的情況下，你民主300先有機會幫到曾俊華。ok，即係話民主300票，根本投唔投曾俊華，都唔會影響林鄭係未當選。（當然，前提係你民主300唔會有叛徒去投林鄭啦。）
咁當而家林鄭真係唔夠票，民主300票最好的策略係未就係投薯片呢？我假定大家係想要民主，而唔係想要曾俊華做明君。咁好明顯，最好的投法就係白票。WHAT？！投白票？咩意思？
我解釋下，如果林鄭唔夠600票，薯片冇你民主300票又唔夠票，咁即係最後冇人夠600票，咁個選舉就會流選。以下引用大公報的評論比大家睇下點樣會流選：
反對派的終極目的是，在3月26日的選舉當天，製造「流選」的結果。客觀原因是，目前並沒有一位有絕對勝算的潛在「候選人」，甚至於出現「勢均力敵」的狀況，這就給反對派提供了一個「技術上擊倒」的絕佳機會。因為根據《行政長官選舉條例》，假如在第一輪的投票後沒有候選人當選，除了得票最高及第二高的候選人可進入下一輪投票外，所有其他候選人會被淘汰。若第二輪投票結束後仍沒有候選人能取得超過600有效選票，選舉會被終止。
如果選舉不是兩人而是三人的話，那麼這種情況就很有可能出現。第一輪兩名呼聲最高的「候選人」都無法超過600票，淘汰最後一名「候選人」；到了第二輪投票，先前被淘汰的「候選人」的原有得票，將會發揮「撥補」的作用，即看哪一位候選人處於劣勢，而將一部分票投給此人，另一部分投「白票」。如果操作成功，第二輪投票也將無法產生結果，「流選」將會出現。一旦「流選」，明年7月1日特區成立二十周年的日子將出現特首缺位的憲政危機，對香港將產生巨大的衝擊。（2016-12-30 警惕反對派製造「流選」三部曲）
由上文可見，流選就係對中共管治香港的最大衝擊。唔係我講，係權威的大公報講。所以，要爭取香港民主，同時實現Anyone but Carrie Lam，好簡單，就係民主300投白票。
其實要促成流選，係唔需要薯片入閘。任何林鄭以外的一個人入閘，儲齊兩個就夠。可以係林鄭+薯片，可以係林鄭+胡官，可以係林鄭+長毛。
究竟民主300票的bargaining power係乜？係用來bargain 民主，定係用來bargain 林鄭以外的人做特首？
如果你覺得民主300係為用來換香港未來五年好過D，咁就要正式同支持曾俊華的商界談判，講未來五年可以有乜野offer。你的談判對象係曾俊華一系的本土資產階級。你一未中個頭埋去，其實只係純粹益佢。
如果你覺得民主300係用來換香港民主，咁正如佔中，對象就係中共。用民主300票促成流選，逼中共即時實行政治改革。
個關鍵係，如果民主300真係咁重要，可以促成曾俊華當選，亦即係話佢地夠關鍵可以促成流選，可以要脅中共。
香港人，唔好夠膽輸唔夠膽贏呀！