立即捐款

校友

校友

行政長官林鄭月娥的中學母校嘉諾撒聖方濟各書院

校友聯署遍地開花,有啲人真係嚇到傻咗。傻咗之後呢,就係咁攻擊啲聯署,話啲校友唔代表學校。

咁首先大部分聯署都應該寫咗不代表學校嘅。咁封聯署代表咩人呢?就係簽嘅校友同師生囉。咁你話你點可以代表所有校友?咁人哋冇咁講過喎,代表嘅就係簽咗嘅校友囉,從來冇話代表埋未簽嗰啲架喎,啲聯署又唔係用校友會出嘅。

咁你話可唔可以唔用校友嘅名譽呢?有啲人仲話咩「騎劫咗學校個名」。即係咁囉,當有個人好成功好出名,啲學校咪爭住出嚟話呢個係我哋校友,咁其實人哋成功唔一定關你學校哉培事架喎,如果呢個校友反咬,學校騎劫咗佢嘅成就,佢嘅成就根本係自己努力得嚟,與你學校無關,啲學校又嬲嬲豬話人忘恩負義、數典忘祖甚至欺師滅祖架啦(下刪十個八個道德批判四字詞),係咪?

校友可唔可以話唔要呢個校友身份呢,事實上係唔得架,校友係一個身份,個身份上帝都改變唔到架,就算你學Avengers 4返去炸咗間學校,都只會製造平行時空,唔會改變到架喎。咁同樣道理,點解校友唔可以用校友呢個身份去聯署呢?

掉返轉講吖,陳同佳邊間學校架?我唔知,咁佢嘅行為代唔代表佢間學校?可唔可以話間學校嘅學生都係潛在殺人犯?梗係唔得啦。學校可能好想切割,唔希望有呢個校友,但係,得㗎咩?

叫得校友就係離開咗學校,咁佢做嘅行為從來都唔會代表學校嘅。做人做學校就唔可以咁賤格,有著數就搶認校友,冇著數就話人騎劫你個校名。最好笑有啲人仲撲出來話,呢啲聯署叫做「不合法聯署」,犯咗咩法呀?報警囉。