浸大雖有學生參選，卻以斷莊作結，投票人數未過 10% 的門檻而無效。
參選學生不止面對失敗，還有洶湧指責。落選可能是因派系相爭的反動員。
＊ ＊ ＊
問：點解想參選？
黃雅文（漣翊會長）：去年我地反外判商拖欠工人遣散費，發現學校高層呃人。由於普通學生接觸唔到高層，係咪可以做多啲嘢？所以參選學生會。
＊ ＊ ＊
問：你地點睇六四？
黃雅文：中共係一個殺人政權，點都要繼續講，唔能夠因為係「隔籬另一國家」而唔講依件事。
＊ ＊ ＊
問：你地會唔會去維園晚會？
黃雅文：我地都係土生土長嘅香港人。但我地認真思考香港前途，中國有冇民主同我地關係密切。
支聯會嘅綱領我地都支持，唔會因為我地係香港人而唔去晚會。＊
支聯會預設左中國人嘅視角，手法亦比較舊。我地希望將批評嘅聲音帶入去。
（註：支聯會五大綱領是「釋放民運人士、平反八九民運、追究屠城責任、結束一黨專政、建設民主中國」。）
＊ ＊ ＊
問：你地點睇中港關係同香港前途？
黃雅文：港獨等方案都可以支持。大前提係平等、自由、民主。
我地願意支持平等、民主、自由嘅香港獨立。
＊ ＊ ＊
問：但浸大編委會報道，你地講過只要大部分港人支持一國一制，你地都接受。＊
（註：goo.gl/SdmVRs，goo.gl/hpFYVY）
黃雅文：當日對答係出現混亂，我因為聲帶發炎，冇出席嗰日諮詢。
但之後兩場公開諮詢，我地都澄清，民主自決本身包含民主價值，人民有自行決定嘅權利，我地唔接受用民主程序得到反民主嘅結果。
我地亦清楚講明，只要社會係平等自由民主，我地都支持香港獨立。但完全唔見報道。
＊ ＊ ＊
問：有冇心理準備要抗爭甚至被捕？
黃雅文：有嘅。我同負責外務嘅同學，都明白喺依個時勢要負刑責。只要群眾知道後果責任，合乎抗爭目標，我地可以同群眾行到最前。
＊ ＊ ＊
問：傘運前但凡社會運動，都會見到學聯同各學生會嘅身影，但近年真係少左很多。你地有什麼意見？
黃雅文：非常同意，所以我地先參選。學界應該重整旗鼓，除左大政治之外，仲有高教議題。比如學額回撥、信貸資料庫，學聯一直跟開依啲問題，我地想延續落去，令同學明白自己處境，知道學聯價值。
＊ ＊ ＊
問：最近當選嘅理大學生會「理凝」有意重返學聯，你地有咩計劃？
黃雅文：退聯後學生運動冇之前所預料變得更加好，學界嘅力量分散。
我地有意重返學聯，想從學生自身嘅利益開始，由下而上，先鞏固內部，再向大議題出發。
＊ ＊ ＊
問：如果當選，你地有咩特色同期望？
黃雅文：我地關心勞工議題。例如有啲同學實習時冇錢收，或者只有最低工資，但搵極都搵唔到相關研究，我地想好好關注。
＊ ＊ ＊
問：你地有冇交代政治背景？
黃雅文：我係浸大社關成員，亦成立左工學同行。
16 年立法會選舉，我做過街工新西候選人黃潤達嘅義工，後來去佢區議員辦工室做過三個月 part-time 幹事。DQ 後我捐錢畀社民連，成為左社民連之友，即社民連義工。
另有一個莊員係大專政改關注組、浸大社關、工學同行成員。
仲有一個莊員係社民連會員。
喺第一場公開諮詢，第一個人問嘅就係依個問題。我地好清楚講哂全莊嘅政治聯繫。
＊ ＊ ＊
問：我從民主牆過嚟（詳後）。你地兩名莊員因社民連背景受狙擊，你地有咩回應？
黃雅文：喺第四場諮詢，有同學再次問到，我地開誠布公，冇任何隱瞞。
唯一嘅社民連成員亦承諾，如果有幸當選就會凍結會籍。所有款項同計劃都要經評議會過目，唔會有利益輸送。
大部分莊員都冇政黨背景，對佢地好唔公道。
我知有啲本土派同社民連有衝突，但當時只有一名莊員喺現場－－佢喺禮賓府中左胡椒噴霧，坐喺度唞緊，只係聽到嘈交，冇牽涉衝突。
我地支莊的確係左。但諮詢嘅時候，我見到同學即使親本土，都 buy 我地政綱，例如實習津貼等勞工保障。
＊ ＊ ＊
問：你地有冇回應齋 Sir 用老師身份為你地助選嘅指控？
黃雅文：齋 Sir 識我地，因為未參選前我地一直跟開啲嘢，比如黃偉國老師受打壓、反對普通話畢業要求。
我理解齋 Sir 嘅支持，不過 Mass mail 未必應該咁用，真係唔好。但齋 Sir 為歷屆學生會、其他學生組織都付出好多。
＊ ＊ ＊
問：你地點睇敗選嘅結果？
黃雅文：我尊重其他同學呼籲唔好投我地。但唔應該喺票站前騷擾想投票嘅同學，先話我地係社民連，接住就話社民連打人。＊
（註：goo.gl/qcWNVZ）
學生會係學生組織對抗校方不公嘅核心。所有本土關注嘅議題我地都有關注，雙方嘅矛盾真係咁大咩？
本土派都支持自由民主平等，我見唔到目標真係差咁遠。
我以為當中嘅矛盾係可以化解，一致嘅目標係可以討論。唔少莊員以前未試過抗爭，都義不容辭拋開過往框框，一齊參與佔領語文中心。
結果依然搞成咁。我心裡面或多或少有啲陰影，唔會再咁易信人。
＊ ＊ ＊
後記
筆者於投票最後一日，截止前數分鐘來到浸大。漣翊已篤定落敗，莊員相擁，但敗選後他們仍留在原地。
當日是浸大學生熊家俊殉身的百日死忌。公眾欲舉辦儀式，須託學生申請。民眾與黃雅文等遊行到民主牆，一起把悼念條幅掛在牆上，正是掛在「漣翊＝社民連；一票不投左膠莊」的標語之下。