圖：工黨成員鄭司律在面書上載的活「小強」示威照
琴日星期日，工黨搞左個請願，為一班住係朗邊既居民爭取改善住屋環境，要求政府盡快安排居民上樓咁話。朗邊係元朗屏山附近，係香港現時唯一用鐵皮組件而成既中轉房屋，係1998年落成。
主流媒體今日都冇乜點報，之不過依家各大政黨都善用「新媒體」，工黨自然不甘後人，成員鄭司律就放左D精華相片上去。相片果然迅速流傳，之不過佢地唔係為響應朗邊既居民，而係工黨既示威道具──一隻放係玻璃樽入面，生鈎鈎既「小強」。
「栗米班塊男」黃浩銘見圖，見狀歡呼，話係好橋，可以衝散D警察陣。不過佢就真係有所不知，社運界雖云衝鐵馬不怕，入差館唔怕，但係都有致命既弱點。八方聽聞不少社運友見到某生物，都會雙腳跳起，大聲驚叫。一直標榜「沒有抗爭，那有改變」既社記職員 Denny To 分享呢張相，嘆曰「此例一開，生靈塗炭」，自稱老衲既 Jaco 更加話：
「好玩唔玩攞甲由黎做道具都有
你老味以後個X個有樣學樣點算
D愛X力癲架陣間佢地又攞甲由出黎點算
到時係咪你班X樣同我食X哂佢
工黨快將滅亡
一X二個退黨保平安」
最弊既係，佢話如果咁搞落去，佢就會退出社運。似乎各前線抗爭友雖然為諗道具各出其謀，但係出「小強」都係三思一下。
八方其實想講，動物真係唔好亂咁玩。動物權益本身就係一個社會運動，最近動物議題爆熱，網上成日都有虐待動物既個案被揭發，爭取終結動物買賣同埋成立動物警察既訴求都幾大。可能係因為動物議題「唔算好敏感」，各大政黨都以此爭客，民主黨又出動物明信片，之前順利單野又大鑼大鼓去秀茂坪警署報案。其餘公民黨、自由黨同埋民建聯都各自設有動物小組，爭客情況激烈到爆。
當然，借動物上位最勁既自然係「鼠王」梁美芬，把油尖旺的老鼠殺到片甲不留，可謂係「民生無小事，最緊要選票」之極致。
社記都好鍾意出動物示威，今年年頭就出過真豬都無咁真既豬，去諷刺特首選舉候選人「豬狗不如」，隻豬係大堂嚇到標尿，事後就引黎唔少動物界既批評。
雖云老鼠同小強都係害蟲，但佢地咁惡無非都係人類搞出黎，撲滅可以，但何必要佢地受咁多苦呢？
當然，工黨今次都唔係無的放矢，八方問過鄭司律，佢話朗邊既居民日日入到屋企就會見到呢D生物，希望政府清楚知道居民既居住環境有幾差。運輸及房屋局局長張炳良之前都到過朗邊兜過個圈既，不過就冇入過屋內面睇下，同小強緣慳一面。高官落區成日做 show，唔係真係去睇民間疾苦，事前往往搵人洗太平地，搵街坊做樣版訪問。假如佢地真心落區睇下小強有幾惡，就唔洗搞到D居民咁嬲，要活捉到政府總部示威啦。
八方見到其實同場都有隻假老鼠做示威道具，可能係因為工黨冇人識捉，八方就建議佢地要同梁美芬請教一下喇！