星期天風光明媚，八方決定走出面書到美孚圍觀「舊中產」反「地產霸權」的節目。其實八方成日會經過美孚，但卻甚少踏入這個屋苑裡，今次真係大開眼界。
走到石油氣庫的工地，原來真係細到咁誇張，成個工地，大概只可以種兩棵大樹，工地同最鄰近的居民露台，大概只有一兩個身位嘅距離，難怪居民會咁嬲，搞到堂堂中層階級，要學大陸同胞咁瞓車底阻工程。
係現場聽啲居民同議員講番「油氣庫」的歴史，佢地面對的情況，真係同大陸同胞差唔多，都係被地產流氓欺壓。不過香港仲慘啲，呢班流氓掌握晒政府行政同法律的漏洞，懂得偷地積比率，識得講「合約精神」，可以擺明車馬㩒住搶。
呢塊地嘅歴史真係曲折，「石油氣庫」本來屬油公司埃克森美孚所有，八五年在首份分區計劃大綱圖，被劃為住宅規劃地。根據在場民協嘅馮檢基議員話，九五年時（按：屏風樓工作小組的版本為1996年），油公司不願同政府「地換地」協議，當年石油氣庫搬走後，議員仲問政府官員，塊地日後點搞，官員話：咁細塊地，唔會起到樓，叫佢地放心。議員就大安旨意，當擺平左件事。
神秘的第三者
但轉過頭，係九十年代尾開始，不斷有神秘的第三者公司向屋宇署申請起樓。去到2009年，埃克森美孚和由新世界控制的匯秀，分別將NKML 25RP和NKML25Sb兩塊加起來都係豆腐潤咁細嘅地，以超低價１億２千萬轉俾與新世界集團有裙帶關係的「祥達」。當居民嘗試追查賣地協議的內容，以及三家公司的關係時，埃克森美孚同新世界都異口同聲話有「保密協議」。好明顯，油公司同新世界，都唔願意抓爛塊面，同政府與居民過唔去。
係美孚新邨行咗一個圈，發覺呢個老牌屋邨點解咁多年來屹立不倒，同邨內嘅設計好有關係，幾乎每家每戶，都會有一個視線開揚嘅露台或大窗，根據呢個設計原則，埃克森美孚無可能將塊咁嘅地來起樓。至於新世界，自從梁展文的醜聞鬧出，大概唔好意思明目張膽走法律罅，費事破壞和諧，得罪中央。最後先至交由與新世界有業務關係的律師所成立的公司去做醜人。
「地換地」，誰將吃掉五億港人肥肉？
話時話，呢個醜人確實好厲害，佢睇清塊地細唔緊要，因為「食咗」成個美孚第八期的剩餘地積比，可以將幢樓起到二、三十層高。最絕的係，即使居民成功阻止工程，政府若選擇用「地換地」的方法解決，按「甲類住宅用地」同整個美孚第八期的地積比去賠償，估計政府要用一塊６億的地皮（１２００００平方尺建築面積Ｘ５千市價）去換祥達以１．２億買來的地。亦即白白送了近５億俾祥達！
林鄭月娥係回應居民時話要：「尊重合約精神」，好像叫居民硬咽地產霸權的「欺凌」。依家居民捨命反抗，各個政黨搶票支援，面對「中產起義」破壞大和諧的大局，中聯辦一個電話問候，政府在「尊重合約精神」的原則下，最終好可能會慷全香港人的慨，白白送五億俾地產商。況且依家提出「地換地」的係居民同政黨，政府仲可以逃過俾人話「官商勾結」的一劫。
遠在德國的阿迪，在面書上亦點出林鄭刻意迴避居民地積比被地產商「搶奪」的問題，睇嚟政府預咗賣大包，送塊肥肉出去。
地產霸權到達「臨界點」之說，有點太樂觀，八方悲觀地見到，這缺德的霸權始終屹立不倒，不論輸贏大小通吃！