正當美孚第八期同背後有新世界的發展商祥達打曬官司既時候，係美孚既另一邊，有個議員卻係社區大大聲爭取要保留另一處疑似會起樓既地方，仲好接近「成功爭取」既階段，八方難免要落去八下。
果位委任議員叫黃達東，係民建聯旗下，佢一直係區內係以五個委任議員既名義聯合租用的辦事處「五聯辦」掛橫額，係去年先殺落美孚第四期平台與民建聯既九龍西立法會議員聯合開設辦事處，保護社區會堂孚佑堂的行動就係係第八期油庫事件爆發後開始既。進展異常順利，呢位黃達東議員聯同居民向城規會申請更改孚佑堂既土地用途，由住宅用地改做「政府、機構或社區」用地，堂堂發展商新世界竟然高調發出聲明，話明無意發展孚佑堂喎。輕輕鬆鬆又「成功爭取」。八方有去到八月頭係孚佑堂外搞既「萬火傳心願，公僕順民心」集會，黃達東連同區內兩位「建制派」議員沈少雄同埋張永森再加民建聯李立法會議員站台，呀黃議員意氣風發，話「和平理性」既爭取先至有效咁話。八方同出席既居民傾計，居民都讚不絕口，話原來發展商都有好人咁話。
八方就係唔多信發展商咁好心，就此上網刮料。面書友庫斯克就大發雷霆，話鄭家純本身就係民建聯監察委員會的成員，美孚石油氣庫單野根本就係黃達東既黨友既好事。又反問黃達東個好黨友既新世界既相關公司攪出石油氣庫單賤格野既時候， 佢做緊Ｄ咩。八方睇返網站文章，係五月曾經調查美孚其餘可供發展商發展既地方，當中提到孚佑堂，佢唔似石油氣庫係獨立，係公契提都無提。孚佑堂係包括左係公契入面，佔一份不可分割業權（undivided share）。公契入面寫到明佢係「comunity center」，所謂既公契，是所有人包括大小業主、發展商、管理公司等都要遵守的契約。不過八方問過一位律師同一位大律師朋友，佢地都唔敢肯定話起到樓定起唔到樓，要睇番曬地契、公契條款等等先夠膽講，因為公契係發展商草擬的，通常都係為保護發展商利益而寫，小業主買樓時通常唔會睇。八方就覺得，孚佑堂多左公契呢重關卡，要發展既複雜程度肯定比油庫高。再者，八方都收到料，第八期事件爆發後，新世界都有兩派意見，一派就強硬派，要打官司到底，一派就態度較軟，覺得為左果「幾億銀」咁搞落去無謂。你話爭佑堂「成功爭取」，都咪話唔關訓街事。
反對美孚興建屏風樓關注小組的發言人葉少舟就話，懷疑有人從新世界處攞到料，話明唔會清拆孚佑堂起樓，於是就籌辦「爭取」行動，目標當然係十一月的區議會選舉。
《明報》今年四月係美孚第八期事件爆發後，曾經出文大談美孚選戰，話民建聯在美孚三個選區的支持率均相當不俗。又引述民建聯就前油庫用地提出三個解決方案，分別係全面清拆重建、發展商賠償予第八期居民同埋降低新建樓宇的高度咁。記者就收到一份由黃達東議員寄俾第八期居民既通訊，確係有講上面三個建議，在通訊中仲明言第八期既事件「有向非理性發展的趨勢。美孚頓成一個抗爭之都」，「須提出理性新思維」云云。八方就此向關注小組查詢，小組成員盧松昌就話，小組確曾與黃達東會面，黃話會幫忙協調，但居民問佢係咪代表政府同新世界，黃又話唔係。盧松昌就逐點反駁上述三個建議，話全面清拆重建要有八期共千多戶一齊做，根本沒可能，又會引起鄰近的第七期居民反對；賠錢俾第八期居民，又唔知賠幾多，太多就發展商無肉食，太少就居民唔滿意；降低樓宇密度，就對其他被人用左剩餘地積比既八期其他住戶都仲係唔公平。
八方曾經約過黃達東議員，不過可能議員事忙，就無理八方喇。