江湖傳聞,四川蜀山已將西域奧林匹克兵器「鏈球」重新鑄成妖兵「豬鏈球」,威力比當年的紫青雙劍更為厲害,並已大量生產。有證據顯示,蜀山怪客正攜此妖兵入侵中原。
---------------------------------------------------------------------------
「各位,我哋係唔可以因為四川蜀山有幾個人死係豬鏈球,有幾百單傳言,就以為人哋會嚟入侵我哋。我哋要吸取前朝英主懵王嘅教訓,佢雖然俾千夫所指話係豬頭,佢雖然真係肥頭耷耳,但到佢走果日都冇科學證據顯示,佢個頭真係豬頭移植嘅。所以我係唔會做任何嘢嘅。」
衛金鏢局總鏢頭周一諾向百姓演說完,便反回鏢局,與十數謀士商討下一步對策。
眾士認為,早兩年既有人練成絕世魔功秘笈《飛典》,閙得江湖腥風血雨,今日應該有殺錯冇放過,立即宰殺豬隻,關掉驛站,加強城門審查,力阻蜀山妖人以豬鏈球殺害百姓。
眾士叫好,但周一諾反對:「你哋知道我嘅名點嚟嘛?正是『一士之諾諾,遠勝眾士之諤諤。』你哋講嘅毫無科學理據,只有我講嘅先算數,一諾之言先係真理。」
眾士面面相覷,周一諾卻突然拿出一個鼓,只見鼓台極低,高只及膝。
「呢個係上任總鏢頭『男兒當自查』嘅楊無爆當年對抗『飛典』魔功嘅獨門兵器——低鼓。有咗佢,咩妖兵都唔使驚。」
突然有一鏈球破簷而下,轟死房內一個奉茶的老翁。眾人大驚,一看轟在地上的鏈球——那裏還是球,活脫脫是一個豬頭。
周一愕:「豬鏈球?」
蜀山怪客飛身而入:「哈哈哈哈,你發覺已經太遲啦。」身隨聲到,隨手執起豬鏈,只見豬頭在他揮動下,虎虎生風。
周一諾:「你哋唔使出手,等我嚟制伏佢。」只見周一諾一蹲,蹲在低鼓的鼓台上,雙手拍動,咚咚作響。
周一諾:「嗱,呢啲就係低鼓嘅威力,縮低個身,重心就低,就唔會咁易落台。等我而家實驗下低鼓嘅威力先…..哎吔…..」
原來蜀山怪客一個豬頭揮出,雖然周一諾剛蹲在低鼓台上,剛巧避過,但怪客巧勁挪移,把豬頭回環掃向周一諾的側面。周一諾給豬頭掃下台,痛不成聲。
周:「豈有此理,我啱啱只係做吓實驗,睇吓低鼓可以有幾大威力,你唔等我試完你就出招,決戰都無啲科學理據。」
蜀山怪客:「廢話,接我絕招『豬鏈球綑』。」怪客甩手飛出豬鏈球,只見豬頭連鎖鏈向周一諾捲去,在他身子繞了幾匝,周一諾立時動彈不得。
眾士看見周一諾被綑,已是綁手綁腳,莫說要阻擋怪客入侵,就連眼前危機都不能解,皆垂頭喪氣。
「快啲放開我。」周一諾大罵,可惜仍然逃不出豬鏈球的綑綁。
怪客啐了一口濃痰,罵道:「肉在砧上,仲多多聲氣,你快啲交出黃金萬兩,如果唔畀,即係唔畀面我嘅巴蜀兄弟。」
突然隆的一聲,大門破開,一隊公差衝入,閃電制伏蜀山怪客,不足十秒便把他押出去。
周一諾喜道:「皇朝公差?估唔到你哋咁快嚟到調查奇兵豬鏈球。」
公差阿頭搖頭:「我哋唔係嚟調查豬鏈球,我哋只係嚟拉造假貨嘅人。」
「假貨?」
「你身上嘅豬鏈頭係假嘅,你用啲力就可以整斷佢。」
周一愕,依言照做,果如他所言。
公差阿頭:「等我教你分辨豬頭。」只見他拿起地上那個豬頭說:「呢個個樣有啲似前朝懵王嘅,係假嘅豬頭。」說罷在身後拿出另一個豬頭道:「呢個,見唔見到左邊有咩特別?睇真啲?老啲㗎,呢啲老左唔老右嘅豬頭,係貨真價實嘅死豬頭。」
周恍然大悟:「好彩有老哥你,唔係我真係死梗呀呢次。係呢,咁四川巴蜀嘅豬鏈頭一案,又進展如何呢?」
「我哋已經主動封鎖所有豬頭出關,加強城門檢查,確保冇豬頭去到你呢度。」
周一諾:「咁我今次真係唔使死人都吸取到教訓,賺晒呀。」
完
歡迎轉貼
葉一知blog:
大本營
http://spaces.msn.com/members/yipyatchi/
符號散餐
http://symbolnomad.blogspot.com/
有話對我說

