http://diumanpark.mysinablog.com/index.php?op=ViewArticle&articleId=242071
立法會議員何俊仁於8月20日在中環麥當勞慘遭三名暴徒痛毆受傷。
莫說何俊仁身為公職人員、民意代表,莫說香港是一個高度法治的社會,即使一個普通市民,於光天化日下遭受如此暴力對待,在任何國家,也是天理不縱,法理不容。
除非被毆那人是拉登,否則,即使那個人是曾鈺成、董建華、鄔維庸等,我們都強烈譴責有關暴行(雖然心裏或會有一絲罪惡的快意),因為社會絕不能向惡勢力的囂張氣焰低頭。在此希望警方盡快輯兇,以淨本港治安。
-------------------------------------------------------------------------
譴責完暴行,就要幫大家上一堂兵法課,教大家喺呢個情況下點樣制伏兇徒。見義勇為,絕不能逞匹夫之勇,大佬,人地四條大隻佬,你又唔黯然又唔銷魂,唔通學楊過咁耍套黯然銷魂掌一打幾十咩?你又好似我地咁有嘴刁,冇神雕,點打?
有勇,也要有謀。細閱報道,兇徒雖然手法利落,但係犯左一個最大嘅錯誤——喺地庫落手。如果你夠膽又夠震定,嘿,唔學楊過學韋小寶,呢幾條友仲走得甩?
此話何解?皆因佢地逃走時要向上跑樓梯,學孫子兵法話齋,佔高地自然得其勢。只要你依足下面嘅做法,你做硬大俠,呢幾條友實走唔甩。
首先,毆打歷時三至五分鐘,有足夠時間佈陷阱。大家如果喺最底層,一見到打人,即刻衝上中層,保住自己安全先,然後睇下有冇人睇水(睇水條友都一定帶cap帽),有嘅話,即刻展開指揮行動。
無錯,四圍嘅人都好驚,但好多時喺咁混亂嘅場面,只要有人有leadership,敢挺身指揮,足以激起其他人嘅勇氣。情況就好98年(好似係)香港機場有架飛機反左,有個男人逼於冒充警察,帶機內嘅人走出機艙一樣。
先要喝令一個鎮定啲嘅女仔報警——唔係睇小女仔,大佬,隨時要肉博喎,你估啲女仔係李莫愁小龍女咩?
跟住落嚟做嘅野就係要拖到警察嚟。如果你喺中層,應該立即喝令麥記職員將店內嘅食油攞晒出來(佢地會好驚,所以你要表現威嚴,咁佢地就會有勇氣follow,如果佢地唔敢,你求其攞張證件扮差佬,佢咁驚仲走埋嚟查你咩!)。然後叫各位鎮定落嚟嘅男士將食油盡情倒落去樓梯到。此招名為「跣到仆街」,兇徒行兇完當然唔會食過開心樂園餐先走,梗係滾水「淥」腳咁走,到時滿梯是油,點喺啲油上面跑?你著nike著timberland都要跣死。
同一時間,叫晒啲男士將中層嘅枱枱凳凳推晒落樓梯到,加埋啲圓形嘅壓縮汽水樽更妙。此招名為「落井下石」,大家稍為睇過三國打仗場面就知,身處高地就梗係用落石,借地心吸力,又慳力,威力又大。幾條友要走果時,就好似舊式大廈後樓梯俾啲雜物塞住,火燭起上嚟想走?一鑊熟就有。
而且,當幾條兇徒發覺通道塞左,就開始怯,一定唔想自己係最後留低被捉果個,自然爭先恐後咁爭上來,絕對唔會齊心有秩序咁逃走。
仲有啲時間,就叫麥記職員準備定大堆鹽、楜椒、糖、滾油等等傷眼物質,一見幾條友喺塞咗嘅通道突圍時,齊齊向佢地兜頭倒落去。此招名曰「倒屎咁倒」,名係核突左啲,但絕對有效,而且借自韋小寶。嗱喳?大佬,你真係楊過咩,對付啲仆街,係唔需要講咩勝之不武。
單單呢三招,足夠拖到警察到場。就算警察蛇王遲遲未到,你估呢幾條友喺咁嘅環境咁嘅心理壓力下衝到上嚟,仲係唔係你對手呢?
咁如果你衝到去最上層即係街上面果層點算呀?變招,但原則不變:落石。隨街攞幾個垃圾筒,一見幾條友衝上來逃走,即刻掟落去,四條友一齊走,你話會唔會一個都唔中(只要留到一個已經夠)?如果搵到人合力,輪番施石,幾條友仲唔死呀?
如果有繩類物體,更加可以喺樓梯口「拉絆馬索」,到時班仆街跌到口腫鼻青,即刻搵件如花身型嘅男子壓住佢,點走呀?
驚佢上嚟追打掟石嘅你?你自己將心比心,當你眼見有同黨落網走唔甩,你會唔會仲咁傻唔急急腳走,反而喺條大街大巷俾人認出、俾途人合力制伏又或咁啱差佬到場活捉呀?
最重要嘅一招都係最老套嘅一招:隨機應變。
以上招式絕對唔係講笑,肯定湊效,因為佢地已犯左必敗之錯:揀左地庫落手。
當然,真係要出手指揮,都唔係常人話咁易就做到。總之,自身安全最重要,如果有勇無謀埋去肉搏犧牲,係就係好型,但有乜意義呢?
雖然兇徒仲未繩之如法,大家就當上面係武俠小說咁睇,補償現實嘅遺憾,快意恩仇一下吧。

