立即捐款

青年高峰會2005賽後報告

  青年高峰會某程度上係青年界別一年一度o既大盛事,所以作為青年組織成員o既我,今年都有去到高峰會,不過今年有o的特別,就係我第一次用參加者o既身份去(前兩年都係用搞手o既身份).

  先說明一下,青年高峰會係一個由青年事務委員會舉辦o既大型會議,次次都會請好多官o黎聽,加埋特首,而青年人就oo個度齋吹成日,話就話官員會聽,但係次次o既成效都好少,會議分上下午兩節,9點至6.

  原本我o地諗住o係會場入去掛起條banner,內容係「實踐青年民主參與由青年發展中心做起」,不過o係臨入會場之前,o係蔡元雲親自游說之下取消o左呢個行動,其實我都唔想屈服,亦都有諗過照掛,不過個會係由好多青年人準備之下堆砌出oo,如果我o係入面玩o,真係一拍兩散之餘亦都會剝削o左佢oo既時間,對佢o地真係唔太公平,所以都係算數,o係會場外派單張.

  其實今年o既上午部份都冇咩咁特別,悶到我o係個位度訓o左成半個鐘覺,因為上午部份只係不斷由各區青年人匯報佢oo既議題討論結果,同埋「曾特首與青年對話」環節,悶到抽筋!最搞笑係有個青年朋友仲叫曾蔭權做司長,的而且確叫「司長」係順口過叫「特首」.

  之後十二點三左右落o左去派單張,竟然畀九展o的食蕉趕!不過都冇理到佢o,因為佢oo黎趕o個陣我o地都準備收工去食飯,所以就好順攤咁執o,不過我有o的火,因為佢o地用o左六個人(1個經理4個食蕉1個停車場食蕉)o黎睇住我o地執o,駛唔駛呀?!家陣搶你o野咩?!大陣仗到好似警察清場咁,我又唔係做o的咩!

  下午就精彩啦,有兩個官o既言論真係要「立此存照」!

  第一係肥仔何志平o既一番話,事緣有個青年人問佢會唔會投放多o的資源去搞多o的文藝康樂活動畀青年人以作推廣,佢回應o既意思大約係「我o地年年都有搞暑期活動畀青年,但係青年就鍾意o係街玩hiphop,o係屋企上網打機做電車男,咁你叫我點?,我覺得佢極度睇唔起青年文化,講真,佢可以接納上述興趣並將hiphop元素加入每年o既青少年暑期活動裡面,但係佢冇咁做,反而將青年文化與傳統文藝放oo係對立面.

  第二個經典級發言係由扶貧委員會秘書謝太講o,事緣講青年與貧窮,o的青年台下發言話青年面對青年貧窮好無力,低工資,弱勢就業,大學學費貴,grant loan利息高等等問題纏擾住青年人,點知台上個謝太突然發難,係咁話「青年要自己上進,唔係下下都要個世界就你,唔可以要求政府咩都畀你!」呢o的咁大右派o既言論,佢講完就即刻畀台下青年輪住o黎插,有個女仔插得超級應棍,佢話「我今日o黎係向政府反映意見,希望可以改善政府對我oo既政策,唔該台上o既官員回應我oo既意見!,非常到肉的回應,不過最後o個個謝太都好似冇咩反應.

  最後我o地又落去派傳單,都有人趕,不過我o地一邊同佢理論一邊派,結果理論o左大半我o地就派晒,跟住就走o.

  今日真係畀我見識到,而家o的建制中人(包括諮詢會委員及官員)作為嘉賓o的態度越o黎越差,o個幾次高峰會都叫做認真回認下青年人o既意見,今年o的嘉賓開始用一種教仔式o既演說去同青年人講o,開始有少少原形畢露囉,係睇唔起你o的青年人o架啦,戲都費是做!

  所以我o地作為青年都真係要開始晒下馬,團結一下青年力量,話畀政府聽我o地唔係細路,唔駛你下下都教訓我o!