體育

【亞協盃】 - 南華 1 - 3 寧平

廣告
【亞協盃】 - 南華 1 - 3 寧平

廣告

圖:足總網頁

今年南華終於重返亞洲賽場,即使南華喺機會有黃豆咁大嘅亞冠附加賽第二場出局,仍有個亞協盃參賽資格,早幾年每逢南華出戰亞協盃場面都幾熱鬧,特別係打入亞協盃4強後,南華成功吸引一班生客(主要係喺亞協盃先會入場),南華打亞協盃理應係一件『萬眾期待』嘅事,因為南華確係全港最多人認識嘅本土足球隊,呢個係事實,連我老母咁Out都知道南華好似係一隊足球隊而唔係洗潔精牌子名,但今年南華似乎對亞協盃嘅宣傳上冇以往咁積極,加上近期戰績一般,或許影響到部分球迷嘅心情,快到亞協盃首仗比賽嘅前幾日,市面上依然充斥一股WFC味道,所以大部分球迷賽前都估計入場人數比較理想嘅都係3-4千到。

而我呢個keyboarder雖然榮幸入選2007年三粒睪丸討論區反南人士暗殺名單之一(但至今仲未俾人暗殺),而我嘅入選更引起其他活躍反南人士之嚴重不滿,認為連我呢啲小混都入選係陀衰佢嘅身分,搞到佢地喺睪丸抗議,更試圖推翻結果,要求重新進行公投。但本地賽歸本地,亞洲賽終歸亞洲,喺本地賽有咩不滿都應該暫時拋諸腦後共同殺敵,出到去亞洲,南華就係香港嘅代表,正如上年嘅晨曦(即係部分球迷所指嘅XX或者嘟嘟),就算在參差都係香港嘅代表,即使你唔認同,亦改變唔到呢個事實,呢啲比賽對於我而言入場嘅原因只有一個,就係支持吓香港嘅代表,你估我真係入去為咗睇佩斯寶12勇士續一戰死沙場,入去為咗睇仰光聯球員隻手紋咗啲咩圖案,入去為咗睇馬爾代夫球王射穿網咩?如果出戰嘅唔係香港嘅代表我真係寧願用呢60蚊買多包煙隊吓加快肺癌效果好過喇。

入場支持南華出擊亞協盃,毒自一人太單調,所以我誠邀咗一名曾經效力英格蘭水晶子宮嘅退役球員作顧問,大佬佢真係識波嘛有乜唔明梗係要問吓佢啦,正所謂活到老學到老,我呢啲keyboarder識條春足球咩,梗係要一個高手喺我隔離榜住先得嘛。

5點幾奴動完畢,專登去藍球場跟咗陣隊扮翁金驊等到6點幾先喺粉嶺上火車出銅鑼灣,點解唔早啲到呢?唔怕火車又壞咩?當然有我嘅原因啦,早幾年南華打亞協盃,每到7點後,坐地窿都會見到一堆堆紅衫,有啲已經急不及待喺到高談闊論緊場比賽,我係專登等到呢個尷尬時間去撞吓呢班紅衫人,如果呢個尷尬時間都仲可以見到一堆堆紅衫喺地窿,即係代表場比賽少人入場極有個譜。

但係,沿途真係唔多覺,睇黎場比賽真係WFC邊撚個得閒理?到現場後,目測連3千人都可能冇,雖然今次南華喺宣傳上係冇以往咁積極,而且對手係一支大家都陌生嘅越南球隊,又收80蚊比平時甲組貴20,但南華本身應該累積咗一定支持者,加上亞洲級比賽或可吸引一啲生客入場,不過結果都係得2千5人都冇,由於大球場大,更顯冷清,雖然預咗入場人數有限,但見到呢個場面,點都有少少失望,喂,收多你20蚊啫,宣傳少咗啲啫,近期成積一般啫,咁就搞到少咗咁多人入場?幾年前主場對佩西普拉有9,558人入場,今日呢隊南華雖然冇國際級球星,但都有唔少本地Top 1球員喺到,外援又有上季波斯尼亞超聯射入15球嘅卡古特,咁就搞到少咗咁多人入場?今場嘅入場人數係南華參加亞協盃咁多年來最少人入場嘅第一場主場比賽,點解會咁?不如問問大家點解會咁仲好啦。

講返場比賽,主隊南華嘅陣容大部分球迷都估到,而寧平凱撒水泥前中嘅排陣都與我想像嘅差唔多,後面就與我想像唔一樣,入籍嘅尼日利亞中堅黃凱撒後備,全越班後防,最高個位只不過係178cm,寧平喺越南就係出名有前冇後,排出咁嘅防線真係令我對南華突然信心大增。

不過事實與『以為』及幻想往往相反,由卡古特錯失大好機會後,南華情況急轉直下,實力成疑嘅寧平慢慢地展示佢地嘅功力,不論於個人把握、個人技術及組織性上,寧平都係好一啲,只要執一執後防及守門員,肯定唔會搞到好似上季咁差少少降班。比賽嘅過程唔多講,隔離個位前水晶宮球員睇到擰晒頭,坐喺我後面個班西裝友由起初屌柒寧平到最後反支持寧平180度嘅轉變分分鐘仲精彩過場比賽。

1比3,雖然早有心理準備南華有機會輸波,但南華嘅表現其實係可以好啲,寧平嘅後防真係好弱吓,但南華依然冇咩板爹,老老實實真係打得幾差吓,亦要謝天謝地,南華可以唔洗輸多幾球,夠運。

今場南華嘅問題就唔講咁多喇,去佢地個專頁睇吓仲好啦大把專家已經分析晒,不如講吓個畸形旁証同寧平好過啦。寧平嘅羅馬尼亞前鋒禾尼亞今場展現功架,好多時南華球員要兩至三個埋去先搞得佢掂,佢亦係寧平贏波關鍵球員,呢位前鋒冇喺越職出過場,佢只係寧平專登為咗亞協盃而註冊嘅外援,事關越職只可以註冊3個外援,所以被稱為『秘密武器』,秘密到寧平球迷都唔多知佢乜料。而呢位球員之前踢過意大利丁組,但冇咩表現,喺CV上睇係一般,但CV還CV,實用永遠才是王道。

而另一入籍咗越南嘅巴西中場丁大文,越南國家隊應該要諗吓呢位球員,佢係值得入選,如果咁辛苦叫人入籍而最終目的只係希望呢位球員喺越職中不計外援,實在太浪費,越南足總內部有高層依然保守,「越南國家隊應該由越南人承擔」,呢句搞到教練選人都要就住,又何必呢?如果係對國家有幫助,點解唔選佢?如果越南肯行呢招,分分鐘亞洲杯預賽中局面會改寫。

至於守門員阮文董今仗就非常蝦碌,接高空波多次判斷失誤,又玩牛油手,幸好南華嘅射門中龍次數唔多,難怪上季寧平差啲降班,喺隔離人見人愛車見車載隻眼拳頭咁大嘅晨曦大眼妹話呢位董生3月5日會代表越南國家隊對香港隊,我當然立刻糾正,大眼妹呢鋪真係眼大睇過龍,今日嘅越南可能選個U19都唔選佢,但其實今次又真係我錯,今次阮文董確係有入選越南國家隊,但我相信陳阮強或陳寶玉先係正選,如果阮文董真係到時嘅正選,以佢對南華嘅表現黎睇,香港隊唔係冇機會。

至於個畸形旁証,我懷疑係咪有個精神病人衝入球證更衣室打暈旁証在著佢啲衫扮出黎?分分鐘仲衰過丙丁組嘅實習球證。

下場對吉蘭丹,非常關鍵。

廣告