立即捐款

媒體

香港唔可以無亞視?

香港唔可以無亞視?
廣告

廣告

有傳聞通訊辦本周六開會建議不給予亞視續牌,當然我們亦心中有數那位出名逆民意的特首一定唔會咁順攤,不過,一切猜測之時,良心電視台竟然跑出來說:香港唔可以無亞視。

以上呢句相信大部份香港人聽到都會爆粗甚至叫佢唔好去死(咁當然,仲有一部份好愛亞視但講唔出亞視有乜節目既支持者),不過都值得去諗:點解香港唔可以無左亞視呢?

老老實實,本人現時除了日語大放送之外,應該都無乜點睇亞視。就在我看呢個咁僅有既節目,留意呢個良心電視台夏日主打,睇完個宣傳短片,以為自己眼花,又真係唔知講乜好。不如睇下呢段宣傳片:

夏日之選,介紹左乜呢?睇完都唔覺有乜介紹下話。咁不如睇下呢條片,七月之選:

綜藝節目都係回歸回歸節目,明既大家,呢樣之後再研究;紀錄片呢下先至令我佩服!野性的呼喚係咪舊架?世界大事一百年,仲同你講人類登月?國際台既推介仲好笑,劇集推介,係甄子丹系列,即係呢,歲月留聲台播得,國際台配上英文字幕又播得,得左。

八月呢?主打清談節目,Meiling姐自己贊助自己個節目,國際台既電影無講乜名但望落好舊;咁歲月留聲推介新朱門怨,哦。

香港點解唔可以無亞視?我唯一諗到就係:因為亞視係維穩費其中一個最大消費目標。前兩晚果個節目,邊個贊助,唔駛多講啦;各個組織攪一攪晚會,製作費都要錢架嘛。

另外,清談節目,好幾位主持背境如何,大家又心中有數;高志森胡恩威之類主持既節目,做左幾多年?亞視,係令到只要你願意愛國,你就有機會。我要上亞視春晚,咪係咁囉。

咁,又有人會話,亞視僅有每年大Show如亞洲小姐亞洲先生與及台慶,好好笑架播!其他台做唔到呢個質素架播!係呀,不過,我地仲要浪費大氣電波係呢個電視台身上?

香港人好多野無得揀,都希望電視台有多少少選擇,有質素既節目。呢個要求真係好卑微,唔知今次會唔會有奇蹟呢?

原文刊於此

廣告