立即捐款

張飛人

黐線講故佬一名 網誌

生活

MK仔,其實都幾過癮

MK仔,其實都幾過癮
廣告

廣告

MK仔呢個名詞其實好廣泛,金毛飛仔打扮可以叫MK仔,古惑仔又可以叫MK仔,著衫潮啲又可以叫MK仔,總之你睇佢唔順眼都可以叫人MK仔。

我幾十歲人,遇見嘅MK仔都唔少次,當中有令我鄙視,有令我恥笑,有令我覺得佢地可憐,更有令我落荒而逃保平安……

今日就開始講下我幾次面對MK仔嘅經歷先。第一單就當然俾我扮下威先啦。

話說有日我放工,經過急症室門口,見到兩個應該唔夠20歲嘅排骨金毛紋身mk 仔正在離開醫院。其中一個臉部豬頭咁樣,身上都唔少傷,另一個人除咗塊臉有少少損傷之外,就無乜點受傷。

少傷嗰個就扶住嚴重啲嗰果一拐一拐咁樣離開。大家迎面行過,我就望住阿豬頭欣賞呢件人間藝術品,少傷嗰件mk 見到我望到實,就大聲喝我:

「喂,你望乜撚嘢呀?」

嘩,醫院范圍內你都咁惡?我心諗你兩件死mk 瘦骨如柴,岩岩俾人打完都仲咁惡,醫院范圍內我真係驚你屎忽有牙咩?正正當時我仲係一個黐線佬,所以就同佢地玩玩。

「哥仔你又唔駛咁惡嘅,我身為一個醫護人員,見你地受咗傷,望多眼都唔為過啫。」

「咁你望撚夠就好走啦。」

「就係未夠呢,我睇你個fd 都幾傷吓喎,岩岩俾仇家伏呀?」我一路講一路行埋去,仲伸隻手去摸下重傷啲嗰個頭。

「屌你老母咪撚摸啦,關你撚事咩。」

「你我都有父母,何需屌老母呢。點呀,頭先例牌又係同醫生講話自己跌親啦,點呀,有無照下個頭有無受震蕩呀?」我仍然望住佢個豬頭。

「少少傷,洗撚照咩,走開啦你。」

「咁又唔係呀,呢啲嘢好多時都唔係即刻發出黎架,雖然你哋應該唔會有工傷,但照下照該會好啲喎。我睇完就自然會走開架喇,黎黎黎!俾哥哥睇下有無毀到容,哎喲!死囉,你額頭傷到咁,點解唔叫醫生幫你聯下針呀。」

「屌你老母行撚開啦,信唔信我打你丫拿。」

「後生仔你咪衝動啦,呢度醫院,而家收工時間,好多人經過架,你打我,實俾人拉架,制唔過。」

「屌你老母你係唔係黐線架。」

「黐得過你兩個,無啦啦同人打交,俾人打到豬頭咁樣仲要黎排隊,我睇電影唔係話社團有黑市醫生架咩?」

「你都戇鳩嘅,邊個話我哋俾人打呀?十幾人打兩個我地都頂得住啦。」

「你岩,十幾人打你兩個,你都仲只係小小傷,但你兄弟就豬頭咁嘅樣喎,你功夫咁了得,剩係用黎自保呀?」

「關你撚事咩,死撚開啦仆街。」

「我實死開,不過下次見到人就唔好咁惡鬧人啤乜撚野喇,隨時會俾人執多劑架。」

「屌你老母你係唔係玩野呀?」

「唉,下次再俾人打就唔好黎公立醫院喇,好多差佬架,等陣講錯野俾人拉就唔好啦。你咁惡,我都係走喇,睇你地受咗傷都好難坐巴士架喇。黎,黎,黎,我俾舊水過你哋坐的士返屋企啦。」

本以為MK仔會屌鳩我當佢地乞兒,點知佢又真係伸手出嚟接張一佰蚊,仲同我講句多謝添。

其實呢個MK仔本質都唔是好壞啫,只不過耳儒目染下俾身邊嘅人教壞咗啫,只要佢肯離開班壞人,改過自身都應該唔難嘅。

見佢態度突然變好咗,我臨走前忍唔住講:

劈友打交受傷嘅係你,得益嘅就係班所謂嘅大佬,你傷咗又無人理,連一舊水都要,唉……我年終都見唔少古惑仔劈友劈到斷手斷腳,跟大佬,有乜謂呢?唉…

廣告