明報, 關仁: 引述陳允中博士

轉載自明報,世紀,
作者:關仁

是日也，朱凱迪寫皇后，哀傷。
正如昨日在本版撰文的陳允中博士所指，如果政府從一開始就把皇后碼頭納入保護範圍，並且做足諮詢，那根本不會令「經濟發展」同「文化保育」成為衝突，因為，一切都是可以解決的技術問題，根本唔使二選一。之不過，政府粗疏在先，規劃者粗暴在後，事到臨尾，咁就梗係乜都冇得救啦。呢就叫做霸王硬上弓，先做出既成事實，話之你。
對於皇后，像朱凱迪一類後生仔女照例挺身保護，佢搞個聯署運動，兩三日內已經召喚包括李歐梵、董啟章在內的幾百人簽名，認真巴閉，雖然產生不了實質作用，卻已足夠顯現文化人的價值取向。
關仁認為，呢班後生仔女應該食住上，諗辦法將保護皇后碼頭的聯署擴大轉化，等佢變成一篇「尊重人文價值」宣言，希望集合各方力量，呼籲政府承諾加強注重香港人文面貌。
點解要擴大戰線？好簡單，因為從西九龍到灣仔利東街，從天星鐘樓到皇后碼頭，以至日後的深水舊區、上環舊區等等等等等，統統在「人文價值」的大框架下有值得保護的地方，而所謂保護，當然唔係乜都唔拆得，而係必須提出有創建的計劃，活化舊區，令舊區既可恢復生機，亦可有所發展。要達此目的，必須先在心底有「人文價值」，否則，只會將舊區統統搬走或弄成模型玩具，跟活化理想距離十萬九千公里。
今次保護皇后，龍應台教授本來答應寫文章支援，只可惜目前她人在台灣，正忙基金會的「思沙龍」活動，唯有日後再執筆。她的思沙龍，五月下旬將邀請梁文道和馬家輝到台灣四所大學演講，講題跟香港文化有關，希望呢兩條友唔好去到福爾摩莎唱衰香港喇。最後一提：本周版面重頭戲係葉劉淑儀回憶錄連載，記得追讀。

香港獨立媒體 - Comments for "陳允中：天星、皇后與假諮詢"

明報, 關仁: 引述陳允中博士