立即捐款

林鄭唔會夠CY鬥

林鄭唔會夠CY鬥

明眼人都睇到,特首戰已揭開序幕。梁政協副主席紆尊降貴,有國家領導人唔做,係要做深圳南小城市的首長,近來嘢嘢啄住林鄭。林鄭也不甘示弱,叫梁振英做KOL——「KOL」三字一早就有問題,近年也迅速貶值,林鄭當然有踩低梁之意,問題係,林鄭主政的特區政府,幾日前先因呢位KOL而在防疫上「朝令夕改」,彈出彈入。

按牌面,林鄭係輸硬畀梁振英的。梁振英政治鬥爭智慧實在不錯,由佢上台以嚟,都覺得佢隱隱有老毛的小影子,正正式式老謀深算。佢在任時留吓的gestures和sound bites,總係令你咬牙切齒,但林鄭在任時留下的,則叫你恥笑一世(八達通、戴咗除返落嚟、海南雞……),兩人的政治觸覺實在相差太遠。

更重要係,狼英的人格和人際肯定比林鄭優勝。狼英一向有真心粉絲,不少人真心膜拜佢,梁粉並沒有因為佢當日黯然下台而散去,且一直伺機而動,近來就越戰越勇。反觀林鄭,問一問,還有多少人記得「粉奶」這個稱號?當日林鄭被戲謔為政府奶媽(明指執行能力高,暗指其霸道,甚麼都管一餐),才有「奶粉對薯粉」之戰。這個詞語今日已很少人提,因為林鄭根本沒粉,實在想不到香港有哪一個人物係林鄭嘅忠粉!而聽朋友講,有公務員服待過兩任特首,承認兩人都禍港,但如果在工作上迫住揀一個做老細,寧取CY都永不取林鄭,可見林鄭在人際關係上實在難頂到冇人有。

一年多前,我覺得CY復辟係冇可能(正如我也以為林鄭都冇乜理由仲可以連任),因為我實在諗唔通,一個畀皇帝踢咗落嚟嘅奴才,點可能由同一個皇帝點返佢做同一個位呢?咁即係當日皇帝係睇錯?主子的顏面何存呢?這樣做不為世人所恥笑嗎?但今日的形勢唔同。首先,今日嘅香港仲有咩係超乎想像嘅呢?冇嘅,你話我聽香港明日就由習近平親自落場兼任特首,我都信。第二,最關鍵的,就係仲有邊個香港人有呢個心想做特首?如今要做特首,成本可高了,第一個條件可能就是願意接受國際制裁,現金出糧,冇銀行戶口(這一點林鄭反而佔優),但香港人從來不是政治動物,土生土長的香港政界人物其實都係「醒目仔」,邊個咁蠢願意得罪國際去當一個傀儡小官?國安法前的香港還叫有吸引力,如今?我們的特首還餘下多少權力呀?

好了,算來算去,就是一個已被制裁的林鄭,和一個唔知點解真係好鍾意做特首嘅國家領導人。如果兩個都揀唔落,就搵個紫荊黨那類大陸精英來做好了。如此形勢,你話CY係咪完全冇機呢?又唔係。

點都好,既然香港都淪落至此,只好買定花生,看CY把林鄭當唐唐咁玩到謝,再謝十倍,也不失為一種亂世娛樂。所以,CY,加油,唔好留手。

(本網歡迎各界投稿,文章內容為作者個人意見,並不代表本網立場。)