港鐵北環線環評研究文件顯示，北環線可能會唧多個聽都冇聽過既新港鐵站出嚟，位置（錦上路以南擴建）好可能喺港鐵八鄉維修中心度，錦上路同荃灣西站中間，同現有西鐵線／屯馬線完全重疊。依家話會潛在預留定個位，如果起得成擴建左個站，大西北人搭鐵出嚟好可能又要多幾分鐘停個站，更多人同你迫鐵出市區。呢個決定究竟有冇問過住緊屯元天既市民？
為乜整多個站？好可能又係配合多一個地鐵上蓋港鐵式豪宅，因為根據現時個站附近收棕地起樓既規模，根本唔夠支撐一個站。
幾年前錦田南發展計劃已經計劃八鄉車廠做6,060伙嘅私人住宅，宜家連埋個站上去，又駁通另一個港鐵王國，好有可能成舊益港鐵變超級無敵地產商。
呢個潛在新站駁通嘅，仲有近日喋喋不休要發展居屋嘅郊野公園範圍，開通之後，旁邊個大欖郊野公園同集水區都危危乎，亦係個站無端端喺石頭爆出黎既潛在原因。
以區域規劃來睇，其實本身八鄉車廠可以連同整個將會進行嘅錦田南發展計劃一併規劃，例如轉為公屋發展，而無需自動波將上蓋用地送比港鐵、拎走上蓋發展權起貴價私樓。整個錦田南規劃，亦有空間吸納某批人提倡嘅平價居屋計劃，無須搞郊野公園，挑動社會紛爭。
所以今次曝光嘅除咗一個橫空出世既新站，仲有呢個港鐵同政府開發郊野公園換嚟嘅另一餐大茶飯。呢個七月，本研會同大家逐一審視港鐵霸權嘅問題，敬請留意！
永續港鐵霸權系列簡介
（本網歡迎各界投稿，文章內容為作者個人意見，並不代表本網立場。）