今年電影節愛之剝脫（日文：愛のむきだし）片名同之前一套韓片撞名，中英文都撞名，但事實係，呢套片名乎其實，唔好以為係剝衫剝褲，而係「剝愛」，將愛的本質完整展示。

我唔識園子溫，之前因為撞期而錯過左紀子之食桌，佢戲路好唔好真係唔知。呢套片長 237 分鐘，我未睇過咁長既戲，真係好大賭博。

以下內容有劇情，如果你仲要睇下場，睇左劇情會好掃興。

胡鬧

首先講佢ｄ胡鬧，真係有特色。可能我坐個位好有利（雖然係右旁），音效聽起好立體，一腳腳咁踢，或一刀刀咁插，ｄ聲都追得好足，心都離左。呢套戲係音效細好用功，特如末段邪教頭目用長刀自殺果一節，由插入，插進，再突番出黎，湧血，四個層次音效都得處理到。

其次要講道具，睇主角玩相機偷拍裙底既手法，好似玩搖搖咁，又加入唔少香港武俠片元素，襯托出主角「變態之王」既身份。不過，真正製造胡鬧既並唔係音效，唔係主題曲，亦唔係故事既內涵：最狂野既內容先至係主角，睇唔到呢一點，就唔知套戲胡鬧ｄ乜野，只係睇到一堆胡鬧既堆砌。

內涵

導演園子溫係呢套戲原著劇本既作者，佢對核心果五個人有好多體會，片中亦有好多時間畀觀眾認識五位核心人物。主角老豆死左老婆之後意識消沉，去佢做神父，主角被迫要去告解，無犯罪都要編會罪名畀自己去告解，之後仲要被迫成為變態裙底偷拍，先可以嘗試令老豆「搵番自己」。其他三個核人物都好多「唔正常」既故仔，一個幾乎仇恨所有男性既反叛少女，一個手段極端既失婚婦人，仲有一個被上流變態老豆迫絕既少女走上邪教頭目之路，練得無所不用其極之術。故仔由五個「唔正常」衝撞而成，其實佢地五個全部都來自好「正常」既社會，被社會強力壓抑下造出五件「次貨」之嘛。

除左人物背景之外，個故仔亦好離奇，而且長得有道理，有人坐我後面以為只係睇左兩個幾鐘，真係時間過得特別快。由於前半個「變態之王」故仔己經好好笑，所以睇唔出有個邪教陰謀。個邪教頭目好似可以將主角任意操控咁，慢慢令觀眾同情同代入主角身份，之後又變身成為浪漫英雄救美片。

愛是有心的

片有一處引用了聖經經文兩次（哥前 13），這是女角 Yoko 教訓主角既說話（當然係日文，以下用中文寫出只係方便），主角之後又朗讀一次給自己聽：

愛是恒久忍耐、又有恩慈，愛是不嫉忌，愛是不自誇，不張狂，不作害羞的事，不求自己的益處，不輕易發怒，不計算人的惡，不喜歡不義，只喜歡真理，凡事包容，凡事相信，凡事盼望，凡事忍耐。愛是永不止息

愛之所以是愛，最重要是因為愛中有心，有心就會嫉忌，有心就會自誇，有心就會張狂，有人就會求自己的益處，有心就會發怒，有人就會計算人的惡，有心就會盲目。我不能說聖經中的愛完全是空洞，但相對起來，主角的愛更加立體，更加有感染力。主角也不喜歡不義，也只喜歡真理，也凡事包容，也凡事相信，也凡事盼望，也凡事忍耐，也有永不止息的愛，但主角唔會利用原罪（指基督教）去屈人損人，堅持到「變態都有變態既尊嚴」。

大團圓結局

呢套戲末段走唔出英雄救美既套路，可能導演怕套戲太過胡鬧，要加入ｄ容易接受既元素。不過，有無人可憐下自殺既邪教頭目呢？

超值

呢套戲唔只係長，而且仲係瘋狂、血腥（但唔殘忍），內涵，離奇都兼備，一定係超值之選，而且以 cult 片來說，戲路算係唔窄。最後不可不提，呢套戲係真人真事（謎：係邊件真人真事？），真係好難相信世界有咁瘋狂既事。

其他評論：
《愛之剝脫》：內褲的純白、爆漿的血紅、17歲的愛之勃起