尋日寫完遊河驚夢，
晚上就發左一個很長嘅夢，
夢中我同東哥入左去一間感覺係中環嘅一間茶餐廳，
茶餐廳好大，
樓底很高，
燈火通明，
豪裝，
我就同東哥講：
「又喺咁租貴地方又豪裝，
做茶餐廳，
點夠皮？」，
東哥笑笑口冇出聲，
我地坐低，
有條女坐落嚟，
但係我又冇搭枱嘅感覺，
自然咁同佢傾起偈，
我話好鍾意食咖哩牛腩，
佢話佢都係，
于是我地一人叫一客咖喱牛腩飯，
好好傾，
東哥唔知幾時唔見左，
定係我地已唔記得左佢。
總之唔再出現。
我地傾吓傾吓，
已經手拉手行喺街上面，
突然我醒起，
問佢：「我地頭先有冇俾過錢？」，
女答：「係喎，我地掛住傾，行左出嚟呀？」，
我心諗：原來食霸王餐咁鬼易咋？
于是擒擒青走番轉頭，
臨走前將手機順手俾左佢揸住。
入番茶餐廳，
個收銀已啤住我，
我拿拿臨俾番錢。
出番嚟，
去到頭先同條女分手嘅地方，
唔見左人，
睇吓旁邊，
原來有一座似山非山嘅物體，
睇係上嚟又似一舊巨型假山擺設多D,
但上高有好多嬉皮鬼佬行嚟行去，
我走左上去，
上面D路好古靈精怪，
搵左好耐，
搵唔番條女，
咁就醒鬼左。
其實我同條女好似講左好多宇宙間的問題，
但一D印象都冇。
