患有急性淋巴白血病o既15歲廣州少女李倩婷，上兩星期嚟左香港籌錢，惹起網民唔少爭議。話說李倩婷出身單親家庭，媽媽患有精神病，而佢就喺年半前患上左白血病（血癌），喺內地已經花左70萬醫治。卒之台灣搵到合適佢o既骨髓，但係要過台灣做手術要成百萬，於是佢就嚟左香港希望有有心人捐助，仲搵到立法會議員梁耀忠同埋一個叫「國際天糧事工」o既團體幫手，仲上左一日報紙宣傳。
其實籌錢醫病日日都有，不過李倩婷o既籌款就真係「反應熱烈」，Facebook 有人開左個 group 叫「強烈要求梁耀忠議員獨自捐助癌病內地女」，而高登亦都熱烈聲討，好多網民話大陸人係蝗蟲，走嚟香港搵著數；又話大陸大把錢，就乜要嚟香港籌；甚至有人叫佢死遠o的，諸如此類。見到咁o既反應，有o的網民就有唔同意見，例如容樂其就話「得志，澤加於民；不得志，修身見於世」，認為梁耀忠係行公義，大家應該支持；而林輝亦都寫左篇文叫「慈悲」，問係唔係因為個女仔係內地人，所以大家就連咁惡毒o既說話都可以講出口，仲 quote 埋馬尼拉事件倖存者李瀅銓嗰句「不向弱者抽刃」o忝，當然亦引嚟好多討論，有成近百個回應。
而認為鬧得有道理o既網民，矛頭亦逐漸轉向「國際天糧事工」同埋佢o既鄔小鶴牧師，話個機構抽行政費抽得勁；而呢位牧師又喺網上口不擇言，因此被質疑係抽水又掠水。亦都有網民質疑解佢係慈善團體但係又係有限公司、而捐款戶口又同其他項目共用，有帳目混亂之嫌喎。但係亦都有熟悉NGO運作o既網民幫手解釋，其實類似情況好常見，唔駛太驚小怪。
依家李倩婷已經籌左55萬，事件暫告一段落。有網民就覺得，由上次反菲律賓到今次李倩婷事件，似乎係一種不時抬頭o既保守主義，甚至有人稱之為『港右』。呢種一邊討厭保皇黨同大商家呢o的特權階級、同時間又對綜援、新移民、菲傭呢o的弱勢社群o既敵視o既態度，背後原因係乜，睇嚟都好值得各位學者評論人深入探討。