立即捐款

Momay

我係熱愛足球嘅油漆佬。 網誌

體育

印尼足球聯賽財政問題嚴重 球員示威追討欠薪

廣告

廣告


印尼足球聯賽財政狀況欠佳,就以西加里曼丹省Persipon為例。

Momaydog老母嘅老鄉Pontianak(坤甸)位處印尼加里萬丹島西部,加里萬丹島即係婆羅洲,北部地方屬於馬來西亞砂勞越及沙巴,西、中、南、東都係屬於印尼管轄。華人羅芳伯就曾經係17世紀於現時坤甸之位置建立蘭芳共和國,可能因為咁嘅原因呢度仍然有唔少華人聚居,不過如果講歷史,明未已經有中國人南下去當地生活,除咗華人,一齊聚居在此嘅仲有馬來人、爪哇人、馬都拉人及婆羅洲原住民達雅人。

坤甸呢個西加里曼丹省最大城市今年終於有足球隊升上印尼半職業化嘅次級聯賽,隊波叫Persatuan Sepak Bola Indonesia Pontianak,印尼坤甸足協,簡稱Persipon Pontianak,廣東話可以讀成佩西邦或佩斯邦,球隊有『赤道老鷹』(Elang Khatulistiwa)之稱,老鷹係當地標誌,坤甸正好位於赤道所以得到此名,本來有足球隊代表西加里曼丹省出戰全國次級聯賽係一件好事,因為代表加里曼丹省唔止得東部、南部先有足球隊,西部一樣有,但要搞好一隊波,現現實實只係有心但冇錢係冇X用,Persipon Pontianak升班後正正受到財政問題困擾。

2013年Persipon Pontianak升上次級聯賽LPIS,不厭其煩在講一次,因為印尼足球聯賽近鬧雙胞嘅關係,半職業化嘅次級聯賽都分咗2個,一個叫LI,一個叫LPIS,LI對上就係Indonesia Super League(ISL),LPIS對上就係Indonesian Premier League(IPL) ,而LI有37隊參加,LPIS就有21隊參加。因為連次級聯賽都打孖上,影響咗球圈嘅正常運作,好多球隊財政狀況都好差,次級聯賽情況更嚴重,球衣上冇任何廣告嘅次級聯賽球隊多的是,欠薪罷工新聞每個星期都有,起初momaydog睇到啲球員有汗出冇糧出嘅新聞都會好激動,正所謂感同身受,不過現時都睇到麻木晒,就知道呢啲事已經去到一個幾咁嚴重嘅地步。

Persipon Pontianak被編入2013 LPIS第一組,共10隊參賽,其他9隊分別係Lampung FC(蘇門答臘南部)、PSMS Medan(蘇門答臘北部)、Persitara Batavia Union F.C(西爪哇)、Persipasi Bekasi(西爪哇)、Persikab Bandung(西爪哇)、PSBL Langsa(蘇門答臘北部)、Persika Karawang(西爪哇)、PSIS Semarang(中爪哇)及PSSB Bireun(蘇門答臘北部),Persipon Pontianak作客呢啲地方一定要搭飛機甚至要在轉機先到,只係睇交通方面已經需要好多錢,只靠球隊微弱資金同坤甸市政府有限資助根本冇可能捱到一季,所以揾贊助是需要的,好幸運地揾到一間坤甸嘅銀行bank kalbar贊助佢地,但贊助嘅費用仍然唔足夠應付一個賽季基本18場比賽,根據pontianak.tribunnews.com喺今年4月一篇主題報導【Persipon Terancam Tanpa Sponsor】(Persipon找不到贊助商的先兆)中提到Persipon面對嘅各項困難,包括坤甸市政府對球隊嘅支持不足,坤甸有唔少企業,但大部分都唔願意投資喺佢地身上,而Persipon嘅支持者數目唔係太多,根本冇咩可能靠門券收益為生。坤甸市絕對唔係一個富裕嘅城市,呢度亦唔似加里萬丹島東部咁有咁多石油、天然資源公司支持足運,呢度嘅足球氣氛亦不及東部,在加上印尼聯賽鬧雙胞後嚇倒唔少贊助,令Persipon Pontianak好難睇到前路。

LPIS規定,每支球隊可以註冊3名外援,但Persipon Pontianak因為冇咩錢,所以要用全印班。Persipon Pontianak主要用坤甸出生嘅球員,但唔少坤甸球員冇咩比賽經驗,所以就請咗前國腳Kurniawan DWI Yulianto(尤利安度)加盟其中,希望佢帶領Persipon Pontianak全體上下打出好成績,雖然球隊冇咩錢,但Kurniawan DWI Yulianto喺印尼嘅地位崇高,可以起到強大嘅宣傳作用,即使佢嘅薪水喺當地算係高,但Persipon Pontianak管理者用盡所有方法都要簽到佢,因為Kurniawan DWI Yulianto係一個『籌碼』,冇咗佢真係WFC,最後Persipon Pontianak嘅計劃成功。

2013年次級聯賽LPIS喺4月展開,展開前Persipon Pontianak陸路北上馬來西亞砂拉越集訓,不過4月24日首仗對Persikab嘅賽事因為Persikab財政問題打唔成,Persipon不戰而勝,嗱,今年真係唔少3比0出現喺印尼賽場,一早投降嘅球隊唔止佩斯寶一隊。4月28日在對PSIS Semarang,又係因為對方財政問題打唔成,Persipon又係不戰而勝,郁都未郁過就連贏2場。5月5日Persipon作客Lampung FC終於打足90分鐘,不過輸3粒,又係3粒。5月15日主場對PSMS Medan輸1比2,5月26日主場對PSBL Langsa和0比0,5月29日主場對Persika和2比2,到6月2日先喺主場真真正正贏一場,2比0勝Persipasi。

但到咗2013年6月13日,Goal.com發文【Skuat Persipon Pontianak Bubar Jalan】,內文指,因為經濟問題,Persipon Pontianak解散。消息一出令人嘩然,6月30日作客Persikab嘅比賽亦打唔成,不過Persipon Pontianak官方Facebook專頁6月26日發文【PERSIPON SUDAH DIPASTIKAN MENGIKUTI PUTARAN KE DUA DU LPIS 2013】,內文指,經濟的確有問題,但係Persipon Pontianak並非解散,目前仍然尋求方法解決問題中,而Persipon Pontianak球迷成立咗坤甸鎮足球支援小組,現時已經接收咗萬隆球迷組織【VIKING】等組織嘅捐款,希望可以幫得幾多得幾多。

Persipon Pontianak嘅個案只係冰山一角,印尼聯賽鬧雙胞後,好多印尼球隊嘅財政狀況好差,唔係老作,佩斯寶大家有眼睇,即使係頂級聯賽,ISL又好IPL又好,欠薪情況都係好普遍。當然啦,印尼聯賽鬧雙胞奇案結束後,印尼國內足球嘅環境可能會好轉,不過本身印尼足球內部問題都係好混亂,要好似泰國咁步入正軌仲未係時候。


圖:幾名去到雅加達示威嘅PSMS Medan(棉蘭)球員

之前香港有貨櫃碼頭工人罷工爭取合理加薪,雖然抗爭成功,但係有報導爆料指有工人懷疑因此事被炒,喺呢個世界每日都有呢啲事發生,而印尼球壇最近都有啲咁嘅事發生咗,不過球員唔係爭取合理加薪,只係爭取返球隊拖欠佢地應有嘅工資,呢啲其實都係應得嘅。merdeka.com引述報導,印尼蘇門答臘球隊PSMS Medan今年繼續一分為二參加兩個聯賽,因為呢個原因今年財政問題嚴重,其中有11名效力ISL PSMS Medan嘅球員有10個月冇糧出,佢地一直都信任球隊會盡快清還拖欠嘅工資俾佢地,但結果都係冇回音,因為印尼冇勞工處,呢11名球員就只好舉行示威同埋揾傳媒搞大件事,希望得到社會關注從而向球隊施壓,結果PSMS Medan炒咗呢11個人,事件引起印尼轟動,PSMS Medan其實曾經都係一支印尼勁旅,如今居然搞成咁,現時印尼足總已經調查緊呢件事,不過呢件事出現咗唔少版本,但拖欠工資點都係事實。

廣告