政經

【七一特刊】盤點反共基地各路人馬

廣告

廣告

WP_20130701_031

北京成日話怕香港會變成受西方資助嘅反共基地,但其實使咩西方資助呢?香港自開埠以來,都有好強嘅顛覆大陸政權傳統,因為香港本身係逃離專政嘅港口,去到今時今日都係,頂唔順大陸無人權、無自由同一黨專政嘅,唔少都會走來香港,變成反共義士。另一方面,亦有一啲「愛國唔愛黨」嘅香港人,乘中港融合之勢,希望改變中國。

由以下眾多反共義士嘅經驗,香港就係,亦只能係「反共基地」。

1.消失中的老反共

二戰後的三十年,香港都係國共鬥爭嘅戰場,武鬥有著名的1956年「雙十暴動」,文鬥戰線更長,親國民黨及親共產黨陣營曾經各自有學校、報章、工會、商店、兒童刊物等等,大打對台,進行各自嘅統戰。當年,親國陣營係不少文化領域仲佔有上風,例如,《兒童樂園》好賣過《小朋友》就係人都知,不少報章到了八十年代還用「民國」年號(例如《星島日報》)。

不過,九七問題一黎,加上解嚴後國民黨都危危乎,後黎仲搞到連戰等人同共產黨搞國共再次合作,喺香港都無心戀戰喇。宜家仲活躍又多人知嘅可能係神州青年服務社,係人民力量創黨團體黎㗎。

2.本土資產階級反共派
咪以為個個做哂政協人大的本土資產階級唔反共,唔通佢地相信共產主義?佢地只係中共嘅統戰對象,而有錢佬都係想搵個靠山,繼續派佢地代理人統治香港,如果唔係點樣繼續係香港同大陸搵錢?

所以,唐營被梁振英同西環鬥垮,李嘉誠等有錢佬表面扮無野,私下就反共,你唔俾面我,我就日日同你呢個香港地下共產黨支部書記對著幹,問你死未?江湖盛傳梁營醜聞都係佢地搞出黎。中共想唔透過呢啲本土資產階級統治香港,都幾難。

3.民主主流派
1989年之後,民主派大佬司徒華、李柱銘要告別中共,圍在支聯會之旁建立起香港的民主派政黨,係中共眼中成為顛覆基地總代表,佢地過往係香港人眼中亦成為民主拒共的中流砥柱,與過渡期裡尋找新主子嘅建制派壁壘分明。

不過,隨住近十年民主派陣營的分化,佢地嘅姿態被某些人形容為溫和,甚至係保守,尤其係2010年嘅政改方案。黃毓民稱民主黨為偽民主派,又有新興網上本土派要鬥臭鬥垮支聯會及民主黨,提出告別六四及「民主中國」,佢地嘅反共形象冇以前咁鮮明。不過,論選票,論六四燭光晚會,係公眾裡面嘅支持度仍然係唔少。

4.托派反共
長毛梁國雄出身七十年代托派組織革馬盟,佢可能係香港「現存」最持續嘅反共派,呢個同中共嘅親斯太林背景有關,托洛茨基派係30年代已成為蘇共同中共要肅清嘅對象,部份中國托派流亡香港,六十年代香港激進青年又受外國托派影響,於是,香港成為大大小小托派出沒嘅地方。

論反共立場鮮明,托派好威水。當司徒華仲係同中共有得傾嘅時候,香港嘅托派就提出反對一黨專政。江湖傳聞,支聯會最受歡迎嘅「結束一黨專政」口號,都係成立時革馬盟遺老吳仲賢堅持推動才有。托派雖然立場堅定,自命先鋒,但係組織力麻麻,冇乜持續又有影響力嘅政治組織,長毛近年選擇了社會民主連線作為其鬥爭基地。

5.法輪功
1999年中共鎮壓法輪功,佢地流亡海外,最接近中國大陸嘅流亡地就係香港。因為中共對佢地嘅迫害,佢地亦成為左反共新興力量。除左練功、傳教及擺街站外,佢地係世界各地都有自己嘅組織,係香港嘅遊行隊伍陣容及聲勢都好架勢,應該冇人冇見過佢地嘅「天滅中共,天祐中華」及退黨運動。佢地又有自己嘅報紙同電視台,所以,雖然唔練教唔信佢地個教嘅人可能沒法參與佢地,但肯定係不容忽視嘅反共力量。

6.「本土派」
香港人係日常生活中本來就有各種模模糊糊嘅中港區別,以前笑大陸人係阿燦、表叔、表姐、大陸喱等等,呢啲區別有歧視,有文化偏見,有大香港主義,有捍衛自己社會資源嘅防衛意識,亦有無傷大雅嘅玩笑成份,本來冇乜政治含義。但係,近年隨著經濟大國崛起,中共插手香港政治日見明顯,兼加上大量大陸遊客湧至,於是,喺「雙非」及奶粉等事件中,形成了新一波以「反蝗」為想像同口號嘅中港矛盾。

有人乘住呢個新民情兼政治形勢,提出具有強烈族群主義味道的本土優先論述,以至「中港區隔」,抵抗中共兼去中國化,把「反蝗」情緒注入政治元素。陳雲嘅「城邦論」係其中一位表表者,反共之餘,也向民主派、社運人士、文化人、中產階級全方位攻擊,企圖重劃香港嘅政治版圖,建立香港民族/族群主義政治意識。

7.唱衰中共
因為香港鄰近中國大陸,雖然我地講廣東話用繁體中文,但都睇得明簡體,亦聽得明普通話,另外,英文雞腸都應付到。再加上香港嘅互聯網同媒體相對自由,我地對中國新聞掌握得較快,唔單止會引用一啲國內的網上消息,亦會用一啲較批判嘅態度去閱讀同批判啲河蟹咗嘅新聞。例如,李旺陽「被自殺」嘅事件,係國內主流媒介完全無報,但香港嘅中文報章同好幾個電子媒體,都引述咗啲維權訊息中心同李旺陽家人嘅消息,令事件公諸於世,挑戰中共嘅審查制度,就連土共都唔敢同北京護航。

雖然香港嘅主流媒體,尤其係兩個免費電視台越來越似國內的中央台,有關中國新聞嘅報導,全部都係正面報導,例如中國出現禽流感,會強調啲醫院免咗藥費,好似係天大恩典咁,變相將國內無錢唔醫人嘅做法變成「正常」嘅常態。不過,批判中共已經成為香港人嘅主體,亦係抗拒香港大陸化/赤化嘅最強抗體,所以京共同土共先咁著緊要喺香港搞國民教育,希望以洗腦嘅方法,令年輕一代無咁批判,但結果引發左一場浩大的反國教運動。

8.「大中華」反共
香港有啲「本土派」會將「中港融合」同「本土」對立,認為主張或不反對融合嘅係「大中華派」、甚至親共。但其實好多到國內做野嘅人,都會係國內散播削弱共產黨管治權嘅價值。例如環保、人權、法治、平等呢類普世價值。

自開放改革後,香港有唔少嘅非政府組織、教會到國內做社會工作,包括扶貧、助學、環保、性別平等、勞工權利等等。當然,呢啲工作會有助化解一啲社會矛盾,但當維持中共一黨專政嘅權貴資本主義嘅胃口越來越大,違反最基本的社會道德,以有毒食物、土地吞併、掠奪自然資源等形式去維持,再保守嘅社會福利同宗教主導嘅項目,都會孕育出對抗暴政嘅力量。汶川地震後,眼見地方政權侵吞捐款,打壓死者家屬同災區義工,好多抱著「愛國」去國內做服務嘅香港人,都頂唔順,要保住香港同暴政對抗。

近幾年,越來越多香港嘅演藝界同文化人到國內發展,雖然有啲會變到好似成龍咁,成日幫共產黨做政治宣傳,但亦唔少藝人同文化人會冒著被封殺嘅風險,喺種種限制之下,傳遞反共抗暴嘅訊息。

廣告