立即捐款

Momay

我係熱愛足球嘅油漆佬。 網誌

體育

老撾國家足球隊打入世界盃!!??

老撾國家足球隊打入世界盃!!??
廣告

廣告

《幸運失敗者》-【老撾打入世界盃!!??】

2005年拍攝嘅《幸運失敗者》(Lucky Loser),一部泰國及老撾合作嘅足球電影,故事描述亞洲小國艾維(Arvee)國家足球隊一直輸多贏少,係亞洲足球公認大魚腩,喺某年世界盃預選賽中艾維被尼泊爾打敗出局,但由於尼泊爾退賽,艾維幸運地成為替補晉身下一圈,所以艾維國被稱為『幸運失敗者』。來自艾維鄰國,泰國嘅教頭阿Pong係一位國際知名教練,一直喺英超執教某球隊。阿Pong嘅姨媽Ming姐係一位賭徒,一次巧合下中咗億元大獎,當記者問Ming姐如何處理呢批龐大資金時,身為忠心泰國足球迷嘅Ming姐說:「當然是將資金捐給泰國國家足球隊!不過我有一個要求,阿Pong要擔當泰國主帥!」泰國足總答應咗Ming姐要求,阿Pong都返咗泰國準備,誰料到泰國足總最後居然改請一位前巴西國家足球隊教練,阿Pong慘被拒於門外,Ming姐有感被出賣,於是乎喺記者室外憤言將錢捐俾鄰國艾維隊都唔會捐俾泰國足總,結果被記者聽到,『Ming姐拯救艾維隊』成為翠日泰國報章頭條,更有報章扭曲事實將阿Pong拖落水,事到如今,阿Pong只好不願意地答應執教艾維國家足球隊。

老撾官員怒氣衝天

喺阿Pong嘅執教之下,艾維國家足球隊由大魚腩變成黑馬,阿Pong亦由不願意地答應執教變成全心全意執教艾維國家足球隊。結局係艾維國家足球隊成功打入世界盃決賽週,雖然3場分組賽全敗失17球,但艾維隊嘅精神依然受到世人尊敬。

其實艾維(Arvee)只係一個虛構國家,《幸運失敗者》原來劇本主角隊伍其實係老撾國家足球隊,但故事引起部分老撾人民不滿,雖然電影描述最後老撾歷史性打入世界盃決賽週,但老撾人民認為當中唔少內容涉及諷刺老撾人,覺得『泰國人正在拿老撾人開玩笑』。2006年初,曼谷舉行《幸運失敗者》首映禮,老撾政府官員被邀請出席,老撾官員睇完電影後除咗笑唔出,更怒氣衝天,翠日消息傳到老撾,不少民眾大表不滿,有見及此,泰國方面為免發生類似2003年泰國藝人失言導致柬埔寨人火燒泰國使館事件,被迫對電影作出改動,將老撾改成虛構國家艾維,以電腦特技處理好球員的球衣,重新配音以及刪減對白,押後於2006年10月(2006世界盃後)喺泰國上畫。

電影內嘅老撾國家足球隊(艾維國家足球隊)爆冷打入世界盃決賽週,但現實世界嘅老撾國家足球隊依然係亞洲足球魚腩,最近舉行嘅亞洲挑戰盃,老撾3戰2敗1和出局,睇黎老撾要打入世界盃真係暫時幾天方夜譚。

有邊個死忠唔想自己支持者嘅球隊贏波?

艾維國家足球隊一部分主力因交通意外無法上趕及比賽,阿Pong只好找來一班騎尼怪頂硬上,呢班騎尼怪有身高2米嘅賭仔,有不務正業嘅MK,有送西瓜嘅西瓜佬,有狗一樣速度嘅捉狗佬......起初大家各自為政,一盤散沙,結果第一場比賽就以0比5不敵朝鮮國家足球隊,阿Pong鼓勵球員再接再厲,但球員似乎已經習慣輸。

第二日,失望之阿Pong獨自出外散心,走入一條冷巷見兩個細路手持足球,利用泥污印牆,原來呢兩個細路嘅爺爺係艾維國家足球隊支持者,當艾維輸波嘅時候佢就去飲酒,有一日佢醉到七彩,就用足球喺牆上留印,從此艾維國家足球隊輸幾多粒佢就印幾多。阿Pong見到滿牆球印,內心好震撼,原來艾維一直只有輸,但阿Pong心平下來後,向細路『宣戰』:「你好好諗吓,如果艾維贏波,你用乜去做記號!」

呢一Part我好有印象,雖然艾維(Arvee)只係一個虛構國家,但類似大魚腩現實係有嘅,類似超級死忠現實係有嘅,球隊一直輸但死忠依然忠心耿耿,不過喺場上有邊個希望一直輸?有邊個死忠唔想自己支持嘅球隊贏波?

幸運失敗者(2005)阿Pong『宣戰』 - 廣東話字幕版
http://youtu.be/O6fieEPh3ZQ

《幸運失敗者》Trailer
https://www.youtube.com/watch?v=8PL5xobLAxs

《幸運失敗者》老撾 vs 烏茲別克
https://www.youtube.com/watch?v=Di1Zv19yZqU

廣告