理大新生註冊日鬧出風波，有人拍到學生組織為了爭取 freshmen 參加迎新活動，在理大出口處口角兼動武，影片在網上廣傳，更吸引到主流媒體的注視。本刊記者訪問了理大學生會中人李同學（化名），從他口中得知，原來在這次衝突背後，與理大部委崛起、評議會與部委之爭、乃至理大同學都不陌生的「暗O」有密切關係。
1. 部委崛起
理大學生會在會長和副會長外，設有數名幹事，分別負責福利、場地物資、體育、社會事務、宣傳和出版等工作。原本的憲制設計，是每年周年大選選出各幹事會後，再由分司不同職務的幹事委任一群同學加入其轄下的部門或委員會，俗稱「部委」。李同學稱，不知從何時開始，各部委的勢力開始座大，變成在周年大選前率先「招莊」，組成各個部委後，再內部推選一人加入下屆幹事會的候選內閣。「部委有好強既歷史承傳，bonding 好強，連老鬼（前部委成員）都會每年番去reg day幫手招人，希望招到最多人上莊，所以好執著要吸引好多 freshmen 玩自己既 o camp。」李同學如此形容。
2. 評議會否決部委 O Camp
與各大院校學生會的做法相若，每年理大各學生組織的迎新活動，都需要經理大學生會評議會（council）審議及批准，方能以符合規則的方式舉辦，獲得新生註冊日指定的攤位招募 freshmen 參加 o camp 等迎新活動。李同學指出，部委雖一向有舉辦 o camp 的傳統，「但近呢 6、7 屆，部委的 o camp 全部不獲 council 通過。」為什麼會不獲通過呢？李同學分析，「枱面上」的原因有兩個：「的而且確，部委搞既 o camp 有好多恐怖既歷史，試過係沙灘玩水浸死人，上哂報；試過燒爛人地個沙灘。第二個理由係，council 認為部委係唔需要搞 o camp，因為部委既存在目的，只係為幹事會分擔行政工作。」
不過，李同學也認為存在「枱底下」的理由：「Council 入面，最多票既其實係唔同學院學系既學生會。院會同系會都要招莊，為左搵多 d 人做自己下莊，唔想咁多 freshmen 俾部委搶走，就唔批准部委搞 o camp。」種種原因加起來，部委近年舉辦的 o camp 便「轉向地下」，成為 poly 學生熟悉的「暗O」。
3. 無王管「暗O」誕生
「所謂既暗 O，就係學生會規則下非法既 o camp。」李同學形容，部委 O camp變成暗 O 後，由於不受監管，出現更多問題，「鍾意點就點。」「有 d 部委 O camp 會收好多人，例如個 camp 名額只有 100 人，佢地可以收 200 個 freshmen 錢，再揀人俾佢去，最後冇得去既人係冇得 refund。」（如何不refund？沒有單據嗎？）「冇得去既 freshmen 事後打俾佢地要求 refund，佢地有d人做法係唔聽電話。單據好多時都唔會俾，就算有都係假單。就算 freshmen 踩上門要 refund，佢地都會左推右推，總之就諗辦法唔俾錢。」另一方面，這些暗 O 的遊戲也最為瘋狂，充斥沒尺度的意淫 game；搞手很多時也沒有為 freshmen 買保險。倘若李同學所言屬實，暗 O 不僅是部委招募下莊之爭，箇中更牽涉龐大金錢利益。
4. 「三大」部委搶freshmen
李同學指出，近年最具爭議性的「暗 O」搞手，是有「三大」之稱的三個部委：福利事務委員會、體育事務委員會、以及宣傳事務委員會。「今次打交既，就係呢三大既人。」他表示，「三大」會用盡一切方法招攬大量 freshmen 參加暗 O，「前幾年會去火車站接人，直接帶佢地上莊房報名，連學生 registration 都 skip 埋。近年仲會誇張到落月台，甚至去到九龍塘站搵 poly freshmen。」他稱，由於「三大」部委不獲批出攤位，他們採取的策略是先從 freshmen 挑選「靚仔靚女」，上前認識他們並「點相」，在他們完成註冊後，在校園出口處接回已「點相」的 freshmen。「佢地接番出黎既人，就係打交果個位。」他憶述，每年「三大」都會在出口處有三條隊，用人和椅子砌成三條通道，當中的人包括「三大」的現莊、上莊及老鬼。「佢地會大嗌，叫 freshmen 行自己果條通道。我相信，對絕大部分 freshmen 而言，果三條隊係好恐怖。」
在種種歷史因素下，當日的一場雨，就成為了衝突的觸發點。「果日落大雨，果三條隊入面既人都擔起摭，為左避雨郁下郁下。其中唔知邊一條隊既人隊到另一邊d凳，然後另一邊又踢番凳。就係咁，其中兩班人就由口角變成動武。」
李同學表示，暗 O 問題其實困擾理大學生已久，雖然理大的學生報已報道多年，但一直未受正視。他對是次衝突有損校譽感到可惜，但也希望這能成為契機，整頓理大學生組織中長久以來的陋習。