從小我就學懂了一招比「九陰真經」更陰、更毒的絕招：「個人名義」，此招一出，金蟬脫殼，頓時脫離所有原有的身份，以自我洗滌過的清新意識去合理化所有不當行為，比「搵食啫，犯法呀？」更天下無敵！
有天我將絕招傳授給我的兒子，之後他在上課時以四字真言問候那個跟他爭女仔的同學，不幸給老師看到後鬧他：「你知唔知身為學生係唔應該講粗口。」「老師，我是以個人名義講的。」；同一日，我背着陳年妻子跟Mary偷情，誰不知被妻子撞到正，她：「賤人！你係我老公嚟㗎，你竟然偷食？」「唔好意思，我都唔想，我係以個人名義食佢的。」；隔天，我跟公司那個美少女人妻鬼混，被上司照肺：「你知唔知公司規矩係唔可以亂搞男女關係。」「我係以個人名義搞的。」；接着，我因為利益出賣了朋友，他以就快斷氣的語調說：「我係你最好的朋友，你出賣我！」「對唔住，我係以個人名義出賣你的。」；我回到家了，老竇得知我又教壞個仔又對唔住老婆又冇咗份工又出賣老死之後，他掌了我一巴，我當然不是等閒之輩，以一招釜底抽薪抽擊佢，佢：「你個衰仔！打老竇！因住畀雷劈！」我抽擊多一下後說：「我係以個人名義打的！」之後，一個雷就將我劈死了。
上到天堂後，不，那裏應該是地獄，我同條友講晒我做的事，他正在準備send我去第十八層的時候跟我說：「作為一個人，你點解可以咁無恥、無賴、無情、無聊、無人性？」「很抱歉，我是以個人名義學習我們的最高領導人。」
轉載自《新報》。