今次公投內容，只係有兩個問題。
第一、澳門市民想不想普選特首。
第二、澳門信不信崔世安做特首。
講真，澳門人極為單純，有屋住有飽飯食，有公園行下，醫療OＫ，不要判冤案，仲年年有錢派，我理鬼你邊個做特首。
最弊就係，除了有錢派，乜野都唔得呢！
崔水安我叫你起公共房屋，幾年批晒比大財團起賭場起酒店，淨返落黎品嗰D，佢話唔可以起晒公共房屋。叫人等新填海Ａ區塊地，頂，擺明搵市民笨啦，填完都要等廿年呀，我今年做老豆個仔都讀大學啦。喂，上一手批比大劉係機場對面塊地呢？法院都話貪污喎，法院死架？現兜兜有地，你耍我去一塊仲係海未填既地？你冇野呀？你仲叫我信你？
通脹唔在講，澳門Ｄ野貴到飛起，問你就笑騎騎，話有做。比左五年機會你啦，你做過D乜？
的士搭唔到，巴士上唔到，二十幾歲結婚冇錢買樓，這就是你的政績，而家大家係條街度問，信唔信得過你，你仲要拉人。好呀，你巴閉，你係特首。
今日拉人的警察，司警，政府官員，我衷心希望，你地個個買晒樓，仲要唔洗供樓，希望你地的細路讀完大學有政府工做，唔洗捱更抵夜輪班工作，結左婚唔洗成個月都同唔到個老公/老婆同床訓覺。返夜班唔洗驚個細路走出街唔返黎。
澳門的人想以後過咩生活，現在就要付出，不管你是支持公投，還是在職務上一定要打壓公投，你都可以上網投。
一定要同崔世安政府表達，你信唔信佢！
文：陳浩南
（來論僅代表投稿者立場）