尋日睇完SCMP篇文，本身非常失望，就寫咗封信鬧鬼佢。不過之後又發覺佢俾人屈，咁就算啦廢事刺激佢... 但打咗咁多字諗諗下又覺得唔抵，不如share 俾大家睇吓，互相鼓勵。（又係好長氣 :P）
戴耀廷教授︰
教授你好！首先多謝你呢兩年前不斷為佔中出嘅力，當中所承受嘅政治壓力，政客同市民嘅批判，官員嘅針鋒相對，甚至係屋企人嘅擔憂，我諗一定係非常非常之大。我代全香港支持你嘅人講一聲多謝，辛苦哂。好可惜我哋唔可以分擔你嘅辛苦你嘅壓力，希望你知道有好多香港人陪你一齊走呢條咁崎嶇嘅道路。
我係睇完Bloomberg嘅訪問後先覺得應該要寫呢封信俾你。老實講，我睇完篇報導後，好失望。失望嘅唔係你話佔中失敗咗，而係你好似已經失去咗你過往對自己理念嘅堅持。
我講一講我嘅故事。七月二號我參加咗預演佔中，第一次俾人拉，之後寫咗篇文，叫《511分之1》。我唔知道你有無睇過，但呢次嘅經驗，呢一篇文，完全咁改變咗我對香港人我對自己同埋我對自己人生嘅睇法。七月二之前，我成日怨成日鬧香港人死到臨頭都唔知乜事，俾人溫水煮蛙都仲係只掛住吃喝玩樂；我亦都怨自己自己點解咁無用，無能力去喚醒香港人，無能力去喚醒身邊嘅朋友同事，甚至係自己嘅屋企人。我同我女朋友講「全世界只得返你會聽我講」，我攬住佢喊，我夾硬拉佢陪我去遊行，去反國教集會。全香港，全世界，我淨係影響到一個人。
但直至七月二，直至《511分之1》嘅出現，一切都唔同咗。女朋友叫我嘗試將自己嘅理念用故事寫出嚟，所以我將今次俾人拉嘅經驗同朋友分享。我估唔到回響係咁大嘅。一個從來只懂得係自己FACEBOOK鬧政府鬧香港人嘅宅男，竟然突然有唔只一個嘅網上新聞媒體搵佢，問可唔可以轉載佢嘅文章。我俾心機睇每一個share 每一個留言，我發現唔係因為我寫得幾咁好幾咁感動，而係因為當你去說服人追隨你嘅時候，你需要再行前一步，其他人先可以係你後面跟住你嘅步伐走。你去遊行然後叫其他人去遊行，有乜咁把閉？但你去公民抗命然後叫人去遊行，人哋先會停一停諗一諗「係喎，呢條友犠牲緊嘅時候，我做緊乜呢？我係咪連行出第一步都唔肯呢？」
我唔想批評佔中嘅策略正唔正確，但我相信你哋係需要一啲實在嘅行動，香港人先會信你，香港人先會跟住你走。我唔認為係中央宣布咗政改方案之後，佔中嘅支持會少咗。佔中嘅支持者少咗，係因為你哋無法去說服大家跟住你去行。
我好明白網上嘅一群係比較走得前，我亦都好明白你哋可能要等一班淨係睇報紙電視嘅香港市民消化一下香港依家嘅狀態，所以我會忍耐，亦都好努力咁勸其他人忍耐。但大家都等得太耐啦，大家都開始懷疑你哋係咪有心去做，大家都開始懷疑你係咪中共派嚟浪費香港人嘅時間。
戴教授，我選擇去相信你，我希望你唔好令香港人失望。希望你諗清楚自己一直宣揚嘅理念，我明白佔中係為咗唔洗佔中，但我唔相信佔中嘅理念係唔想為大家帶來麻煩；我更加唔相信我哋要因為面對現實而放棄我哋一直相信嘅真理。
講返轉頭，你提出佔中果篇文，指引咗大家要行嘅路。但其實你哋實行什麼D-Day 123 嘅時候，我同好多年輕一輩一樣，都係喺度恥笑你哋嘅。我哋一直笑你哋書生論政，笑你哋和理非非愛與和平，笑你哋行為「左膠」，笑你哋低估香港人政治冷感嘅程度。我有嘗試過參加你哋元旦遊行做義工，但真心頂唔順你哋係街頭唱足五個鐘K，所以之後就無再參加你哋啲活動啦。
我一向悲觀，一直諗嘅就係除咗班訓開馬路嘅激進派之外，究竟仲有無香港人會唔怕俾人拉呢？自問自己就做唔到，所以當我嘅中學同學（係佢叫我做佔中義工嘅）向我遞上佔中意向書嘅時候，我放埋咗份嘢係一邊。
令我開始慢慢改變對你哋嘅睇法，係你哋嘅堅持。無論點俾人笑都好，你哋堅持全民參與嘅討論文化，令我開始問自己，以前政黨帶領嘅模式，係咪真係一個健康嘅抗爭模式呢？我都經歷過HKTV事件時，分組討論趕走一半人嘅歷史性時刻。左膠有時諗嘢係太過理想，係唔適當嘅地方做一啲唔適當嘅嘢。但你哋令我明白到，原來政改係每一個市民都可以參與，都應該參與嘅。我哋可以唔只喺一堆政黨同埋學者方案入面揀一個，甚至可以參與其中，成為設計方案嘅一份子。
真正嘅有商有量，唔係果十萬份動員而來嘅建議書，而係佔中三子帶俾我哋嘅商討日。而我竟然一直都恥笑你哋，非常慚愧。
之後，風高浪急。公投、七一、預演佔中、反佔中、律師會不信任動議、八一七遊行，到前兩日嘅人大決議，我哋開心過，亦都傷心過，我哋感動過，我哋亦都受傷過。我希望戴教授明白，香港仲有好多好可愛嘅香港人係度支持緊你。係，或者佔中嘅策略係失敗，但香港人對真理依然追求，香港人心入面依然保持希望。我唔知教授有無睇過 Christopher Nolan嘅蝙蝠俠，入面蝙蝠俠為咗保住Dent 嘅名聲，甘於背負所有嘅罪名。因為佢認為市民需要希望，因為佢認為市民只有保持希望，先會有力量抵抗邪惡，抵抗不公義。而教授嘅"讓愛與和平佔領中環"，就係我哋嘅希望。
其實呢兩日我都有睇到程翔同埋沈旭輝嘅文章，睇完好無奈，係咪真係無辦法呢？係，或者佢哋講嘅嘢都係真嘅。或者中共已經諗住派員抹黑然後鎮壓，或者香港係世界上已經再無報導嘅價值，但我相信香港人。即使我哋面對嘅對手係幾咁黑暗，我哋嘅未來係幾咁暗昧不明，但我相信人性嘅光輝係可以超越槍炮，可以超越國界，可以震撼每個人嘅心靈；我相信佔中運動帶嚟嘅希望，係會喚醒香港人，走出一條香港人自己想行嘅路！只要我哋堅守和平抗爭原則，二零一四年嘅秋天，香港人嘅光輝將會照亮呢個紛亂嘅世界！
我相信未來嘅香港史一定會有一頁關於佔中，一定會有戴耀廷呢個名字。而呢個名字下面係褒定貶呢？呢個人係得把口定係貫徹始終嘅真英雄呢？全在你一念之差。
天佑香港！
1/511
阿滔敬上