媒體

和平抗爭 何暴之有?

廣告
和平抗爭 何暴之有?

廣告

圖:昨晚示威者以身體和平抗爭,最常見的畫面是高舉雙手

五點幾已返家,睇新聞,發覺 NOW 新聞比較正常:

一)起碼會用「公民廣場」呢個名,而唔係 Cable 咁一味話「政府總部東翼前地」;

二)NOW 會將警方出動防暴隊擺頭,到三條至講學生早前衝入公民廣場;Cable 則開始就話「市民衝擊......前地」(前者從未用上「衝擊」字眼);

三)NOW 會報學聯「重奪公民廣場」嘅理念,即本來開放俾公眾嘅地方,點解依家會被政府封閉?「重奪」本屬於市民嘅地方又何罪之有?

再講,就算係「衝擊」,都係因為你起咗九呎高嘅圍欄封住廣場;若果好似以前咁冇遮冇掩,開放俾公眾集會,學生又何需「衝擊」?

老實講,我在場嘅成晚都不知幾和平,只係如呂秉權所講「每隔一陣就嚟個『高潮』」,但每次高潮都係警方發起,唔係無端端噴胡椒噴霧,就係無端端衝擊集會嘅市民(佢哋呢啲就真係衝擊喇);「高潮」之間,其實我哋都係靜靜坐喺度休息。我幻想如果警方全部撤退,淨返集會人士在場,個集會早就自動散檔,洗搞到依家都未搞掂?

仲有,全程集會都有學聯學生或義工主動向我哋派水派乾糧,又提醒我哋自行評估法律風險、如被補後要 send SMS 去邊個電話同留低乜嘢資料,又合力幫「中椒」嘅市民洗眼,都不知幾溫情洋溢,何「暴」之有?

講起「暴」,我以為「防暴」隊係有人掟嘢、搞破壞、燒嘢時至出動;但成晚我搵個人掟過粒沙都冇,只係坐晒喺度休息,做乜出防暴隊?做乜無啦啦時不時就狂噴胡椒噴霧兼惡形惡相(NOW 新聞有較多呢類噴噴霧場面嘅 coverage)?

都係嗰句,根本想衝突發生;點解?難道如網友所講,係梁振英想兌現唯一可以兌現到嘅「競選承諾」?

P.S. 全晚最精彩口號,係市民齊嗌「支持警察罷工」!

廣告