我本來係對佔中抱持觀望態度既人，七一去遊行見到人地話佔中都覺得，傻的嗎？但呢一個星期既發展令我支持佔中。我知道好多人撐佔中同時好憎警察。我雖然撐，但對警方冇敵意。催淚彈，橡膠子彈，連篇大話，放走滋事者，欺壓佔中人士，一切我都睇在眼內。星期六睇到非禮個幾單野真係睇到眼火爆，原本想休息下都要即刻去打沙包發洩，我冇去現場因為知道自己衝動，怕製造更多混亂。
越黎越多關於警察已經唔再理性克制既報導，真係越睇越心寒。呢兩日睇緊本關於路西法效應既書，我覺得佢描述既都好適合呢家個情況（有興趣可以google一下Stanford prison experiment一個好震撼同時好發人心省既實驗）。天使如何變成一個惡魔，除左內在因素，更多人忽略左外在因素。警察呢幾日其實承受左莫大既壓力，係以前從未試過。香港太平盛世幾十年，情況發展到呢家既局面我相信好多人都冇諗過。我地係度要求警方克制理性既同時，自己係咪已經發曬癲咁去謾罵警察？係，出糧係包受氣，但佢地都係人，如果佢可以係咁既環境下都做到理性克制咁佢真係警隊中最出色既精英。但事實上，任何一間公司都冇可能全部都係精英。你估間間都係google?請得返黎都係最top既人才？但你肯定裡面冇平凡既人工作？
我唔係要為邊個講說話，但講真，當初689肯出黎敷衍你地應承住先，總之等你返屋企，之後再慢慢蠶食香港唔得咩？咁強硬一定有佢理由，如果佢唔係IQ負100，咁就好可能係要分化你地，越對立越好。警察越憎你地，就越容易控制佢地黎對付佔中者。前線警察就完全變成佢既棋子。
至於反佔中人士，你地有冇埋怨過樓貴、車費貴、生活指數不斷上升？國教、普教中、東北發展、白皮書、政改、冇香港電視睇、雙非、水貨客、多過7-11既藥妝名錶金鋪、超出香港負荷既自由行，一樣你都冇鬧過？人地呢家代你地去抗爭去爭取你又插？？你係咪覺得你寫信打電話去政府投訴，就有人睬你？去維園坐下就得？人地當你遊花園咋。如果唔係佢地洗咩上街日曬雨淋？未辛苦過咩？你地埋怨自己眼前利益受影響有冇諗過你唔爭取既時候受既影響更多?唔只係你地呢代，毒過巫婆d詛咒，世世代代永無寧日？你標籤自己唔違法係好人既時候你有冇諗過你沉默就係政府最大幫兇？你見到人地強姦緊人，但因為唔關你事，你就走開扮睇唔到。冇錯，你係冇犯法，但咁就係好人？甚至有人仲覺得你著裙你抵死添。我地既民意都一直比政府強姦緊架。
我明白要設身處地好難，我自己都鬧左d警察好多日，但我同時都有鬧過佔中學生唔用腦諗野，叫人辭職？你咁樣只係令人對學生更反感，更分化。可能我冇受過催淚彈，冇感受過你地受既苦，但從來抗爭都係會流血會犧牲，犧牲唔一定係性命，可能有案底，或「錢」途，或健康。但請你地出黎抗爭既時候要做好心理準備，而唔係發現犧牲左既時候去鬧人做乜蝦我（當然87個催淚彈真係QQ線）。如果大家對罵，可以解決到問題，有冇咁多家庭暴力，夫妻離婚，情侶分手，朋友絕交？如果係咁呢個世界簡單得多囉，鬧鬧下就鬧出解決方法，天下太平。
我只係一隻迷你薯仔，我知道自己冇號召力，咩都冇，但我懇請大家冷靜落黎，停止對罵，唔好令警民關係更惡劣，咁樣只會正中689下懐。我地要針對係689，警局ｄ高高層，仲有一班政棍。無論警察做左幾多令人心寒既事，請用自己最寬宏既心去面對，從自己開始停止負能量無限放大。兩個人o益交，總要有一方先低頭，低頭唔代表你錯，唔代表你懦弱，反而顯得你大器，係更想大家有更美好既將來，係希望解決問題而唔係令問題擴大。唔係要你去愛身邊每個人，當然你想都可以既。但至少唔好去仇恨，負面情緒係會累積，仲有連帶周圍既人都變得負面，要有正能量，先會有正面既改變。唯有感化對方都企係自己呢邊，先有望團結一致，爭取理想民主。我知道講就容易，但你唔嘗試就注定永遠失敗。如果難就唔去做，當初點解要出黎爭取民主？
－－－－－－－－－－－－－－－我是分隔線－－－－－－－－－－－－－－－
網站終於恢復正常啦……（感動），隔左幾日先post到出黎好似有d唔夾timing……哈哈
今日有個外國朋友話我，你fb個個都話過曬，個個都錯咁，睇唔明好複雜。
冇錯~呢個世界唔係黑與白既世界，你睇對錯換個角度已經唔同左。我唔係牆頭草，我依然支持佔中，只係同一立場既人做法想法唔一定正確或最好，反之亦然。但有一樣野好肯定，三唔識七，你又唔係佢老闆，你黑面對人，人地都唔會笑住對返你囉，傻架咩。（拿，唔准話納稅人係公務員老闆咁奸架。）主動釋出善意，情緒係可以互相感染架，趁呢兩日氣氛緩和少少，用最真切既心去感動多d警察哥哥姐姐啦～