喺日本，有一種傳統嘅藝術。利用紙張，叫做おりがみ——摺紙。而喺美國，設計師Justin Nagelberg同埋Matthew Waldman就利用摺紙，設計出一款概念雨遮——the Sa™。雖然呢把膠遮睇落真係幾膠，但係比起傳統雨遮，佢可以話係完勝。
第一，佢捨棄傳統嘅傘骨同傘巢結構，令把遮變得更輕、更耐用。採用柔韌性強嘅物料，確保遮身喺強風之下都唔會咁易變形。加上佢平滑嘅表面，減低咗因為外力拉扯而損壞嘅機會。而因為冇咗傘巢，頭同遮之間嘅空間就大大增加，亦即係話可以遮到嘅範圍就更大，咁擔住佢就可以好輕鬆咁喺風雨中抱緊自由喇。
第二，佢易開易收，呢點好重要。平時落雨開慢少少，最多都係淋濕下冇乜所謂。但係今時今日喺香港，雨遮唔只係要嚟擋雨咁簡單。所謂兵貴神速，如果你能夠喺警察哥哥撳胡椒噴霧個掣之前就已經開咗把遮，咁你就贏在起跑線上。
第三，夠環保。採用高度可回收塑膠物料，一體化嘅設計又可以減少維修過程中嘅剩餘物料，符合現今社會可持續發展嘅要求。
第四，安全。用膠造遮，咁就可以大大減低因為遮骨折斷、突出而對人造成嘅傷害，同時亦可以減輕議員「人人都是黃飛鴻」嘅妄想症候群同對「鐵蓮花」嘅恐懼。
有齊以上四點，the Sa™真係冇得輸。到時量產嚟香港，必定大受歡迎。
仲要有黃色添。