立即捐款

足球說故事

你看足球,我說故事。 網誌

體育

呢到係香港人嘅地頭

呢到係香港人嘅地頭
廣告

廣告

圖片來源

早個幾月前入場睇「傑志 VS PSG」。

老實說,買飛的最大衝動源自於外隊訪港。普遍球迷有幾可能夠親身飛到外國入場睇波?雖則唔係話無機會,亦唔係話難實現,但時間、金錢、行程一大爛餐野搞,顧慮頗多,唔係話行幾步,鍾意去就去咁簡單。加上隨隊而來的球星,更有吸引力。是故,外隊訪港,狗衝買飛,平常不過。

友人平生第一次入大球場睇波,問應該如何打扮,是否要著得運動一點以便配合?佢咁問,令我記起零五年巴西訪港時,另一位朋友跟我說的一番話。

朋友:「巴西訪港係咪應該要買番件巴西國家隊球衣?」
我:「洗唔洗呀,你又唔係中意巴西。」
朋友:「應節呀嘛。唔著巴西波衫去睇好似唔係幾好。」
我:「有咩唔係咁好?你咁想著波衫,隨便著件AC米蘭去囉。」
朋友:「巴西隊訪港著米蘭波衫我驚俾人打。唔係啦,我都係去買番件。」

最後朋友果然買了一件巴西球衣,盛為五舊幾水。

為咗場波,買一件唔係平嘅波衫,只著一次。現在諗番起,我諗當時我唔會講咁多野,只會直接反問一句:「點解你唔諗下買港隊波衫?」回歸話題,我沒有跟友人提起這件事,我只叫他隨便想點著就點著無規定,始終朋友也不是一個對足球充滿熱誠的球迷,至少我相信叫佢一定要著波衫入場,佢都只會著一件雜麥牌波衫,或者直接回我一句:「你都戇撚柒鳩。」

後者,機會大啲。

朋友咁樣問唔奇,因為入場有一半人會著波衫入場。驟眼看,著PSG嘅為多,但其他嘅,唔係著主隊傑志球衣,而係「雜麥牌」球衣,有阿仙奴、車路士、米蘭、曼聯等等。記得有次睇討論區,有人問帖問點解香港人睇波咁奇怪,係著啲唔關事嘅波衫去睇波。即係明明傑志對PSG,你無啦啦著咩阿仙奴?曼聯?而更奇嘅係,點解香港人唔係著主隊球衣,而係著客隊球衣?我對回覆無咩印象,畢竟已經好耐之前嘅事,但諗深一層又好似幾有道理。

明明係主場比賽,但竟然係客隊球迷佔多,最吊詭係客隊球迷係來自香港隊嘅球迷。於外國,絕大部份球迷都唔會咁做,你有幾可見到多蒙特主場係坐史浩克零四嘅球迷多過多蒙特球迷?但香港呢啲細小地方,其實不足為奇。大部份港人都不太投入本地足球,你要問佢地今季有邊幾支本地球隊參賽,未必所有人都識答,就算識答都未必知隊入有咩球員。球迷對本地球壇無投入無熱衷,而本地球壇又無外國個份龐大感染力,試問又如何建立一份對球隊有忠誠嘅態度?你叫人入場睇本地聯賽,真係彩你都有味。而得罪講句,唔係因為外隊訪港,鬼有人入場睇?

你話球迷係咪全部偏向支持客隊?我又有所保留。係,好多著PSG球衣入場咣球迷,而球迷入場睇波緊係想睇球星入波,唔係買票入場做咩?對面踢高一班就緊架啦,而且見到邊個球星入波緊係HIGH爆,但唔代表咁樣就係唔支持自己球隊。記得場波,傑志偷到雞即打反擊,球迷即係起哄,人人都好肉緊,希望可以做好呢個攻勢。傳失波射失波可能會屌,但從呢種反應而言,不難看見球迷態度其實都在於主隊身上,而非一面倒偏向客隊。

與其話球迷反主為客,倒不如話入場球迷大多為中立的花生友,邊面有攻勢就叫邊面。

話明表演賽,十居其九都係睇表演為主,根本就無一定嘅立場或態度。入得場,一定有主隊球迷,客隊球迷,但不能忘記也有中立球迷。當然亞洲盃、東亞運個啲就另計啦,無理由走去班東南亞裔球迷面前一齊嗌口號掛。

好多人問,點解一有外隊訪港,主場嘅香港就好似變到作客咁,支持客隊多過主隊,甚至會不斷踩自己主隊球員,又會話輸咁大比數攞架黎丟。真心講句,表演賽,你無立場支持邊一隊唔緊要,睇波求開心,反正友誼賽,但你不必要去踩主隊球員,甚至出言屌鳩番主隊。你唔係諗住香港隊真係贏到堂堂世界前幾名嘅阿根廷?如果你要搵野黎嘈,仲入場睇波做乜鳩?番屋企對住波多野結衣,將所有怨氣發洩係佢身上咪仲好,無謂多浪費幾舊水入場睇你所謂「曬時間」嘅比賽。

香港隊,的確係一支實力唔夠出眾嘅球隊,就算幾咁支持香港隊,呢個都係一個不爭事實。而家香港同其他亞洲足球相比仍有一定距離,但往往球迷就要求佢踢到似德國、阿根廷、荷蘭、巴西咁上下實力,咁點踢?輸一場就話影衰香港,最好快啲解散港足。但老老豆豆,最影衰香港,係有呢啲咁嘅「一場球迷」。

香港,就係一個好千奇百趣嘅地方,搞革命可以好和平,入場睇波應可以好特別。你話係咪錯,又未必,呢個世界無話一定要跟大路而行。而樂觀啲諗,呢種係我地本地嘅一個特色。但當然,我都希望有一日見到外隊訪港,有更多支持和打氣聲係比主隊嘅香港,畢竟呢到始終係香港人地頭!

對不?

廣告