佔中踏入第廿五日，對眼根本唔可以喺佔中新聞上移開。但此時此刻，原來有好多千奇爆趣嘅事無聲無息正在發生中……
啱啱睇新聞，無意中發現到阿G.E.M. 成為「環宇太空」形象大使，黎緊十個月將會去荷蘭接受訓練，稍後會隨隊上太空。
睇到呢個新聞，真係相當震撼，有十億萬個疑問：
其實係唔係因為佢出名個肺大，可以承受外太空壓力，所以搵佢？
阿G.E.M. 出名愛國…
- 經酒泉發射站升空好似更顯對祖國嘅信任，不如轉場去大陸升空？
- 參加荷蘭嘅訓練課程，呢D 係勾結外國勢力，定係勾結外太空勢力？
- 佢咁愛祖國，會唔會行出太空倉「樣」支國旗出來？
阿G.E.M.要將自己嘅音樂帶上太空…
- 音樂真係無分國界，我唔擔心外星人唔明。但我會覺得行出個太空船唱，D 外星人會聽得清楚D。
- 會唔會地球人覺得好聽，外星人覺得係挑釁，會唔會撩起外星人把火架？
- 未上太空紅館飛都貴過Lady Gaga，返黎開show 係唔係會推出太空價？ TBB第日除左亞太區最受歡迎女歌手，睇黎要加多個外太空最受歡迎女歌手。
大是大非當前，總有一個政治冷感嘅阿G.E.M. 喺你左近……
學生集會當晚，香港警方施放催淚彈清場前一日，阿G.E.M.係facebook 發開心相，問粉絲：「禮拜六啦！明天又一個新開始！大家周末在幹嘛？」。有如此行徑嘅人，我其實係唔係唔應該期望太高？
敢上太空，都唔敢討論佔中？
點計上太空都高危過討論佔中。如果阿G.E.M.彈左上太空，彈唔返落地面，聽落點都驚過積極關心本土新聞，表達意見，發揮公眾人物的影響力。
作為具影響力嘅公眾人物，經常都話要對社會公益盡一份力，點解大部份藝人對香港時事連表態都完全唔積極？生活係香港，竟然可以完全迴避佔中議題。佢地係唔係生活喺香港另一個區，係唔係out of我地個18 區？
有政治冷感嘅何止一個G.E.M.，阿 G.E.M.呢D人物無處不在，但如果我地發現身邊有G.E.M.，不如鼓勵佢關心多D社會事務呀。
PS. 此時此刻，我又諗起阿G.E.M.之前撰文撐特首，其實上太空有冇多個位？不如叫阿G.E.M. 搵埋特首齊齊去啦。你話上到太空會唔會有個掣係可以係太空船彈特首出銀河系呢？
原文載於姐死姐還在facebook專頁