今次學聯同政府對話係全港直播，透過電視比市民去了解一下政改。當一家大細，朋友，同事都坐喺部電視面前，雖然喺「前設」框架下去對話令人都預咗整個對話都沒太大進展，但仍然期待學聯表現，至少都令全港市民去睇清睇楚政府係政改立埸上嘅取態，甚至係醜態(劉肛華)。
而且比屋企人同埋一向政治冷感嘅人去睇下，，從而了解一下咩叫做「政治」。
但整個對話之中，我慢慢跟唔到林鄭同其他人究竟講緊啲咩，我只係覺得佢地所講嘅內容由一大堆文字堆砌成一篇文咁不斷充斥住整個言論。去到一半，已經有人問我:「阿明，可唔可以講下佢地究竟講緊咩? 我真係聽唔明。」
我唔知今晚喺電視機旁邊睇直播嘅人有冇呢種感覺，所謂嘅政治就係一班政客講一啲我地唔明嘅野？本來政治就比人感覺好似好複離，變得好抗拒去接觸，甚至有人「討厭政治」。今次直播難得公開對話，但卻比人有種「丫！我都係聽唔明佢地講咩！會唔會係我唔識政治呢？」
雖然有人話狗官講野係廢，聽唔明係正常。
但令我諗起一套日劇，劇中某年輕議員亦同兩位老政客進行公開全國直播辯論，但一直被兩位老政客嘲笑「唔識政治」，但嗰位年輕議員反問睇緊電視嘅觀眾明唔明佢地講緊咩。
當學聯成員講野時，我竟然完全無以上感覺，我完全明白到周永康佢地講緊咩。對話完後，我明白到「學生」同「政客」分別，前者係發自內心，真誠表達自己感受，對爭取嘅野堅定不移，無需包裝無需堆砌，簡單直接，令人一聽就明白，但後者明顯有所顧忌，不想背負責任，用深字堆砌，令人有種「帶你遊花園，講咗等於無講」嘅感覺。
呢啲就係所謂嘅政府官員。
去到一半時間，已經有人放棄睇落去，似乎佢地腦海都諗緊一樣野:「反正我唔識政治，我都聽唔明。」
咁究竟用咩方法去表達同令人了解政治?
我諗起劇中一句 : 「請用小學五年級學生聽得懂的話來解釋政治!」
雖然對話無咩大進展同結果，但仗仲未打完，學生們，加油!路仍然好長。