其實我想講「港人講地」好耐，依個媒體嘅讀者群廣闊至支持佔領同反佔領者都會引用當中文章， 佢嘅用字尚算平和，表面上好似中立咁以事論事，好似係度講緊香港時事咁，身為香港人本該尊重媒體嘅言論自由，但係當我見到一個搵借口去支持打記者嘅 面書回覆竟然有十幾人 like
對於依種支持暴力嘅歪理，我真係要講出我對依個媒體嘅睇法，以下係我用唔同角度去分析下依個媒體：
背景：
首先睇下佢咩背景，個媒體其實係由梁粉張震遠及梁振英競選辦顧問鄧爾邦攪出黎，以前甚至有梁粉宣傳部之稱，不過忙碌嘅香港人可能已經唔記得。
讀者群：
根據傳統智慧又或者現在嘅吸引力法則，一個人有咩意向就會吸引到咩人痴埋一堆，所以觀看讀者群某程度上可以睇下依個媒體嘅取向，而依個媒體嘅 Facebook 正好係一個好好嘅觀察渠道：
以下係一個關於打記者嘅報道，細看一下讀者回覆，一個支持打記者嘅 post 竟然可以有十幾人 like，實在好恐怖，
內容傾斜：
有無人見過依個媒體批評過政府？我地個政府真係完美到無懈可擊？
資料真假混雜，滲入導向性訊息：
最恐怖嘅訊息傳道唔係全部假料，真有啲假有啲先呃到人。
「講地」時不時會有啲正面訊息傳播，例如以下一側：
「比賽中受傷 少女選手揹對手走過終點」
大家睇到有個媒體傳播正面訊息自然會生出好感，但係“講地“會係不經不覺間係一啲文章裏面滲透導向性訊息，例如以下一側文章：
所謂公務員聯署公開信之我見
http://www.speakout.hk/index.php/2013-11-04-09-33-03/2013-12-21-08-43-26...
標題好似講緊公務員嘅公開信，但係魔鬼就在細節：
「每個公務員，或多或少都是執行香港不同的法律，作為執法者....」
依句野睇落「義正辭嚴」，但係諗真啲？我地香港嘅核心價值唔係三權分立去維持法治咩？警察又係執法，立法會議員又係執法，法官都係執法咁會點？假設有個阿婆係街買雞蛋點知俾食環拉咗話佢係小販賣蛋，佢可以去搵議員投訴嗎？可以去法庭申請司法覆核嗎？三個機構都變咗執法機構根本就變咗自己人查自己人，情況就好似當年無廉處果陣，反貪部係警察部嘅其中一個部門，最後依個部門唔只無反貪仲自己貪埋一份。
依類型嘅媒體恐怖之處係佢會講啲真係有建設性嘅訊息搏取人嘅信任，然後就會係資訊裏面滲入啲似是而非嘅訊息從而令人開始接受歪理。
小小的感想：
無論大家係咩取態都多，只要係想香港好嘅都唔好輕易俾人曚騙，有時抽離一下自己立場，冷靜地觀察一下，大家可能會察覺到平時睇唔到嘅野！
小小的建議：
係我地睇一個媒體嘅時候，不妨留意一下媒體嘅背景，例如係創辦人，仲有就係讀者留言，因為物以類聚，乜野嘅媒體先會吸引乜野人，而且你係一個環境耐咗，耳濡目染下你嘅思想就會愈來愈接近依個環境，大家唔怕自己逐漸變成一個支持暴力嘅人嗎？