立即捐款

動物

他朝君體也相同之我祝你黎緊一百生都做魚生

他朝君體也相同之我祝你黎緊一百生都做魚生
廣告

廣告

(純粹悼念條魚文章)

FB根本係一部「視覺跳樓機」……

FB對我黎講根本係一部流動版視覺跳樓機,你永遠都唔知,下一秒拉個news feed,係有咩彈出來?如果下一秒係忌廉哥或者最新款劉江華垃圾桶,當然係no problem啦。但朋友仔當中,一定有幾個係變態或者個期神經受到某D衝擊,有人會po幾千隻曱甴造成嘅頸鏈,亦有人share FearFactor睇人點鯨舌犀牛睪丸。每一個feed,都可以係一個「攞你命3千」武器。好彩我意志力尚算超卓,如果唔係我好可能成為首個睇FB嚇到喪生嘅人類。

FB自動播video,同坐跳樓機唔比攬安全帶係冇分別……

FB自動播video呢個function,係完全唔比你有準備嘅時間,你火箭升空都數10下呀。如果我睇左caption,自己click黎睇嚇到瀨屎,係我自己攞黎賤,只怪我唔打定底著「包大人」屎尿片。你自動播,我個心真係離一離。

星期六睇左段無人性煮魚片段,我發左兩晚惡夢……

段片嘅主角係一條魚,又如果重拍呢段片做成語動畫廊,個主題必定係「生不如死」。

  • 片段一開始,個廚師冇扑暈條魚,就立即刮佢魚鱗,條魚喪掙扎。你想像下,唔好話生剝你層皮,如果有人用BBQ 個隻大箝,喪扯你加拿大D毛同頭髮。真係諗起都痛呀。
  • 廚師隨即用刀劏開條魚嘅下半身,再拎哂D 內臟出來。你又想像下,偷腎集團生劏你,偷左你pair腎,係唔係憤怒了,最憤怒都莫過如比你知佢偷緊你pair腎。
  • 重頭戲黎啦,個廚師好似差佬用黑布矇頭咁,包住條魚嘅上半身,放條魚嘅下半身係滾油炸。

我睇到呢到,我真係好困惑,你而家食魚姐,你使唔使食之前SM 條魚呀?邊個仆街食魚食到咁仆街呀?

我以為個成件事完左,真係估佢唔到,佢仲係條魚上面打左個芡。個條魚經歷左咁多,竟然仲未死得眼閉,上台比人一路夾D 肉,個咀一路開開合合…

我祝發明呢個煮法嘅個個人黎緊一百世都做魚生……

我見住條魚死得咁轟烈,我真係久久未能平伏。有冇人話我知咁樣SM條魚,係咪會好食左?我睇完真係好想為條魚打堂齋,我呢個月都唔食魚生。我祝個廚師以及咁樣食佢個D 人黎緊一百世都做魚生,次次都落係名將廚師嘅手中,同發臭的紅豆壽司相伴。

我發左兩晚惡夢,我相信係條魚冤魂索命……

我隔mon觀火,睇住條魚咁死法。我發左兩晚惡夢,夢見我pair腳比人炸左。我見到我熟左pair 腳好似煲湯D瘦肉咁。我一直都有個疑問,以前睇《天與地》,我好想知人肉到底係紅肉定白肉,人肉我冇食過,牙肉我有試過唔小心咬左忽出來,呢兩晚嘅惡夢令我相信我應該係紅肉黎架。

對上一次我嚇到瀨屎已經係大學時去澳洲參觀博物館,睇鴨咀獸標本。我見到個隻乾左嘅鴨咀獸好似成條臘鴨咁,我個晚成晚就夢見比隻鴨咀獸個仆街咀喪夾我隻腳。當時同學仔安慰我應該係訓覺壓住對腳。但今次條魚死得咁慘烈,我真係「忘不了」呀。

PS. 段片好嘔心,我只cap圖。我provide條link比想練膽嘅朋友仔自行訓練自己啦。有人話睇變態野就好似去譚仔食米線咁,可以步步進階,由10小辣開始食到變大辣。但我想講我受夠啦,比個清湯米線我洗滌下心靈啦。

再PS. 條魚你今晚真係唔好再搵我啦,我睇你點死架渣,我冇落order架。嗚呀,媽咪呀,好驚呀。

煮魚片段
文章原載於姐死姐還在Facebook專頁

廣告