立即捐款

陳兆銓

香港理工大學香港專上學院雙語及傳意講師,老師身分以外,只是一個普通香港人。 網誌

教育

撐粵語!撐香港!

撐粵語!撐香港!
廣告

廣告

今個星期較早前,我同事喺我facebook Timeline share一則題為〈港孩不講粵語:家長「英普行先」 棄粵語成大勢〉嘅報章報導,讀後發現報導入面嘅家長「棄粵語(註一:為表達香港/港式粵語嘅獨特性,以下會使用「(香港)廣東話」一詞) 背後嘅邏輯真係荒謬之極,所以以下我想從常識同語言學嘅角度逐點作出回應,喺呢度開番班Second Language Acquisition(SLA)(第二語言獲得)

(註二:呢篇文嘅內容特意用(香港)廣東話撰寫,以配合討論嘅主題,亦希望籍此宣傳埋呢種屬於我哋嘅語言)

謬論一、「(女兒就讀英文小學5年級嘅爸爸) Herbert 直言會以子女前途『行先』,『咁都好無奈,係要有啲犧牲(指犧牲廣東話)。』」

即係噉,個重點係,你要英普「行先」,冇問題,但咩「好無奈,係要有啲(另一寫法為「尐」)犧牲」?第一、冇人逼你為咗學普通話而犧牲廣東話,無咩奈呢;第二、學語言,又或者學其他嘢,例如學樂器、玩運動,唔會話學咗一種,另一種就會差咗、甚至冇咗、有你冇佢(雖然,喺語言學界有關語言獲得嘅研究指出,小朋友喺學習多語嘅初期,會對學習緊嘅各種語言產生混亂,混淆兩種語言,甚至出現stronger language(強語言) 同 weaker language(弱語言) 之分,但呢個係SLA -- 尤其係學習多語 – 嘅過程入面最正常不過嘅「陣痛期」,而呢種「強弱語言」嘅明顯分別亦會隨住個小朋友學習多語愈來愈深入而慢慢消失),所以完全冇必要犧牲一種語言,成件事根本就唔合邏輯!

謬論二、「香港教育學院幼兒教育學系於去年進行的問卷調查顯示,810名育有3歲或以下幼童的受訪家長中,逾6成多的受訪家長表示願意以子女廣東話水平下降為代價,換取更高的英、普水平。」

哈!呢點就仲好笑!乜原來想學好一種語言,係以一種語言水平下降為代價,從而換取其他語言嘅水平(上升)?我諗喺現實世界學習任何一樣嘢,都唔會係噉樣學法,你估而家講緊嘅係漫畫世界入面嘅所謂「等價交換」法則呀?
(註三:「等價交換」係喺日本漫畫《鋼之鍊金術師》入面經常提到嘅鍊金術嘅基本法則)

謬論三、「女兒就讀小2的蔡先生謂,廣東話使用上的廣泛性較低,『普通話,馬來西亞、新加坡都會講。』」

「廣泛性低」?蔡先生,根據政府統計處嘅資料同教育局嘅講法,你而家住緊嘅香港,接近97% 嘅本地人口,都係以(香港)廣東話為家居同埋日常交際嘅常用語言,而呢種語言亦係土生土長(?)嘅閣下嘅母語。至於你所提及嘅馬來西亞、新加坡都唔會話因為講普通話而唔講佢哋嘅本土母語嘅,以馬來西亞為例,就更係馬來語、廣東話(係呀,重點係呢度)、英語加籍貫語,至少四語並行。根據你嘅講法,其實更加要講嘅應該係廣東話,因為呢種語言(而唔係普通話) 先係馬來西亞華語!最重要嘅一點係,引用文化評論人、次文化堂堂長彭志銘一句話:「咩人講咩話」,馬來西亞人講馬來語,香港人講(香港)廣東話,而我哋之所以係香港人,就係因為我哋講(香港)廣東話而唔係講普通話,就係咁簡單!你講咩話亦代表咗你係咩人,係你張身分證!好地地自己張身分證唔好好保管,無啦啦走去換其他身分證?

最後,英語嚟講,其實呢班家長都已經着重咗好耐㗎,平時同仔女講嘢都會用英文,但你哋知唔知SLA 嘅成果,好大程度係取決於language input(語言輸入) 嘅quantity(量) 同quality(質) 嘅呢?除非你同我一樣認同並認可Hong Kong English(港式英語) 係應該享有作為一種New Variety of English(新英語方言) 嘅地位,而更重要係你哋自己又覺得想你哋尐仔女學到純正、標準嘅港式英語(之但係我又知你哋唔係),否則,當我喺街度都總係成日聽到你哋嘅英語水平都只係停留喺「BB, what『熱時』『尐時』?(I will now recap in English: BB, what is this?)」嘅時候,試問又點樣能夠令你哋嘅仔女學好你哋所嚮往嘅standard(British or American) English(標準(英式或美式)英語) 呢?更唔好講話學好普通話啦(雖然,我知你哋當中可能有唔少家長嘅普通話比你哋嘅英文好得多,但點都唔會好得過你哋嘅母語廣東話啩)!

後話:

報導尾段指出,「就廣東話的傳承問題,教育局發言人表示特區政府一直重視推廣『2文3語』,而廣東話是香港的主要語言,地位毋庸置疑,故教育局重視學生在廣東話方面的學習,並就此為教師提供不同的培訓活動及教學資源。惟文化評論人彭志銘指,時下家長過於功利,本土粵語文化大倒退,情況已揭開廣東話沒落的序幕,長此下去,普通話或將成為香港的主要語言,『香港作為(大陸)廣東話嘅最後基地,如果都守唔住,廣東話就會慢慢沒落!』香港教育學院語言學及現代語言系助理教授錢志安……坦言,本港未來的語言政策,對廣東話的發展很重要。」

一句到尾:自己語言自己救!保育(香港)廣東話,一定要靠我哋自己,唔好旨意其他人、更唔好旨意政府!報導入面提及受訪學生「在校接受『普教中』訓練,同學間均以英語或普通話溝通」已經話緊畀我哋知:(香港)廣東話正趨向沒落,連帶佢所盛載嘅香港文化亦會隨之沒落!唔好老奉我哋而家仲識得用(香港)廣東話,一定要繼續使用、了解、傳承(香港)廣東話!

報章報導原文

廣告