攝：Gundam Lam
（一）絕食
就絕食來講，我個人比較冷血，冇話感動心痛。亦冇話覺得一定要食包先有得抗爭，或者絕食係自殘不應為的考慮。講到尾一句，有用定冇用。不過呢個問題唔易答。至少我冇一定答案。
絕食係一種道德感召。用自殘身體表示真誠與決心。問題係做比邊個睇，係未會感動到佢地。係自己太殘之前，係未會有明顯效果。最大影響係，如果絕食一次無 效，就好難落台。除非準備自焚升級，如果唔係都好難收場。上次反國教多少都叫勝利，咁就成為今次繼續絕的基礎。當然亦唔可以係二打六絕，猶如七傷拳，自己 名聲唔夠去絕，冇人理就冇用。
要感動邊個？
如今之鋒幾乎係運動第一人，當然有足夠的名聲去絕。但佢想感動邊個？我都唔係好肯定。可以先從肯定唔係的人講起。第一唔係，當然係中共政權，佢宜得你死， 又點會介意你絕食餓親。其次係梁振英之流已徹底投誠的走狗，當然亦唔介意你死。另一方面，日日係街頭的義士，其實都已經夠晒投入，你再絕多幾下佢都唔會再 投入運動，因為已日日係街，冇得再多。
咁仲有乜人呢？首先，其實社會上仲有好多中間派。如果睇民調就知，仲有好多人無話支持邊個陣營。當然你可以話攪左咁耐，要歸都歸晒邊，仲有中立的話，呢批 人就係冷血份子，冇得救。但的確又仲有好多陰謀論話學生係被洗腦，收錢。你可能覺得好離譜，但真係有人信，至少用來做藉口比自己信，繼續犬儒。絕食自殘， 就係一種手段去破呢種陰謀論。佢都自殘到死，仲點陰你？收錢做野都有個限度掛？唔係話所有人都會回心轉意，但至少係行動上比一種力量。Touch wood 之鋒有乜事，我可以同家中長輩講，之鋒係真心架，冇可能係為私利。呢種論述隨之鋒越來越虛弱，甚至進出醫院，可以更有效咁回應犬儒者的陰謀論。
另一方面，其實仲有好多支持運動，但始終唔係好落場的朋友。佢地會上facebook，掛黃絲profile pic，但未必會日日上街。而且其中有好多和理非非，唔接受行動升級。絕食又係要對住呢班人。其實絕食算係一種道德高地，用自我犧牲去逼使他人自己比較一下自己的付出夠不夠。基本上本土派成人鬧人付出不夠。In a way係對的，但鬧人係唔會令被鬧者多付出。真正的方法係要要道德去感召佢地。絕食就係一個方法，自殘就係最純粹的象徵。其實香港人真係好犬儒，你有少少利益，佢就覺得出來係益左人。魚蛋邏輯的堅實超乎想像。有時你會奇怪點解香港人咁受年輕人感動。其實係倒轉，香港人超犬儒，乜人都唔信。但學生絕食，就冇得再陰謀論，於是終於要感動。（所以本土派幾時出一個絕食的年輕領袖，其實都可以感動好多人。不過呢樣同要感動中共一樣咁難。）
其實有數你計，差不多20％的人支持持續佔領，但最近上街的人始終不及9.28之後的十萬人計，可知民氣已減弱。問題係，點先可以谷返個十萬廿萬人出來，而唔係得個一兩萬？我認為絕食真正的對象，其實就係9.28當時上街的廿萬人。試想，果有十萬兵馬圍政總，龍和、特辦早已拿下。但就係冇。所以行動要升級，就一定要再聚民氣。一定要當初因催淚彈而上街的人民再出現，才有升級的可能。
當然，來到呢度，你可以懷疑，絕食真係得咩？真係可以谷人出來？坦白講，我都唔知。因為，講多次，我比較冷血，唔係幾知d人點先會感動。但總有的，總有哪些朋友，覺得之鋒可以咁犧牲，點解我唔做多少少？
至於好多日日係街上的朋友，應該就係最多覺得絕來無用，晒氣。不過，正因為你唔使再比佢感動出來，你先會咁諗。有時you don't feel a thing，唔等如佢冇用。不過今次係未真係會聚到民氣，我都唔知。講到呢度，我都係有d佩服之鋒盡人事，聽天命的風骨。
感動以外
不過未住，原來仲有一班人，係絕食對象，就係泛民。有朋友問而家進退兩難，仲求升級？呢個論調同泛民幾似。不過泛民更直白，明講再攪落去會影響選情。講到呢度，你先知道原來之鋒係要防止泛民要撤，所以站上道德高地，拒絕泛民逼宮。畢竟有著絕食的大義，有人民支持，就不容易被撤退派拖散。
（二）暴動時代與謀略
不過撤退派的質疑始終存在，就係唔撤又可點？但到左某個位，已唔係進退問題。而家退，激進派都會繼續。ppl dun go home, coz there is nowhere to go. 問題好簡單，年輕人已睇穿現時體制已冇希望，明白香港的政制唔改變，民生都唔使諗。（參看《後雨傘運動：告別政治冷感的年代》作者﹕鄭煒、袁瑋熙）
兩種民主派
坦白講，好快大家的階級性格就會顯露，因為香港好快走向暴動社會，與大陸睇齊。民主派都會分成兩派。一派覺得有得退，係因為佢地係制度中仲有利益，認為退左可以慢慢返社區攪，呢D就係所謂中產。暫且叫深耕派。另一派認為退無可退，因為佢地真正感到香港社會只會越來越差，所謂的法律、秩序，到左某個地步，只係用來壓逼佢地的工具。唔好以為佢地係低學歷廢青，更多係高學歷但生活艱難的一群。後者只會一直要求行動升級，直至壓迫體制結束。暫且叫持續派。
整體群眾問題消失，暴動時代來臨
有人以策略視野去問，究竟學生唔退，升級用武力抗爭可以點？背後其實有一個整體社會的想像。即係你攪一場運動，唔可以自己不斷升級，唔理廣大市民意願，因為咁會失去市民支持，孤立自己。現階段，至少有雙學，仍然有呢個社運想像。好多唔可以亂衝，要堅持非暴力，其實唔係其人真係好信非暴力，而係將呢個形象當成維持運動支持度的工具。但隨警政的暴力升級，頭破血流的畫面不斷出現，非暴力以維持形象的好，就會被實質在前線被打的壞消磨。一方面警方形象越差，可增加市民用武力的正當性；同時亦有反擊以抗前線暴力的必要，唔係下下冒生命危險比人打頭都唔係辦法。
資產階級應該慶幸仲有黃之鋒，某程度上堅持有秩序的抗爭。黃之鋒退下，就係暴力抗爭登場之時。因為雙學仲有魄力(野心？)去維持整個社運的團結。但如果冇左雙學，持續派將不顧整體社會形象去武力升級。因為呢班人，只有眼前路沒有身後身。
你可能話，咁即係暴動？我唔會支持！但我想講呢個唔係支唔支持的問題，而是政治經濟局勢下的必然發展。只要有幾萬個或幾千個持續派，不顧社會整體觀感去升級，對既有社會秩序都可以構成徹底破壞。中產至資產階級將永無寧日，香港金融中心地位隨時毀於一旦。
暴動人口不減反增
呢個時候會有人諗起日本赤軍，其激進行為，如綁架、殺人，如何令日本社運自七十年代始一沉不起，激進派連溫和派全告終結。但我想講，當時日本社會正值經濟急速發展，今日所知的超級消費主義興起，將反抗意志完全吸乾。而呢件事，唔會係香港發生。因為現時的中共，完全冇讓利的打算。日本青年面對七八十年代的榮境與經濟改善，不可能係香港發生。現時所見的官商勾結只會變本加厲，民生繼續惡化。治安會越來越差，向上流動的只剩警察與建制。可想像，更多人會看到法律與秩序的虛妄，資本主義賴以維持的虛假意識逐漸消解。與日赤的時代不同，全球資本主義的衰敗，將為暴動提供不絕的低層人口。燦爛的一座金融城市或者會上終結。
何去何從？
坦白講，面對呢個走勢，我係憂心忡忡。但持續派的不顧後果，及暴動時代的出現，並不是所謂的理性社運可以控制。因為被壓迫者的怒吼，係非暴力社運失敗後並唔會消失，只會以直接的暴力，向所有壓迫的秩序反撲，沒完沒了。
當然另一個可能係中共為保香港金融中心地位，竟然認受與英美共治，容許香港民主代。事實上暴動都未必唔work，歷史上好多民主化歷程中都有暴動。上次香港暴動，都逼使港英改弦易轍，邁向現代化管治。不過亦真係有法治一去不反的例子啦。說到底，如果唔係革命，現政權有最大的主導權去決定事態的發展。
願香港人民保佑香港。