立即捐款

運動公社

發佈和討論有關運動與政治/社會/經濟的議題 https://www.facebook.com/sportscommune 網誌

教育

公社書記語錄(一):HEA搞青訓只靠援將 梁振英的車路士路線

公社書記語錄(一):HEA搞青訓只靠援將 梁振英的車路士路線
廣告

廣告

話說巴塞隆拿同車路士都係兩大歐洲豪門,我就兩隊都唔鍾意。不過呢,感覺上除非真係皇馬或者愛斯賓奴球迷,否則一般人都好難憎巴塞。但係講到車仔……就算唔討厭車仔,一般非車迷對佢印象都係麻麻。箇中原因查實好簡單,巴塞幾有錢都好,都落晒心機去青訓。美斯、恩尼斯達、沙維、巴斯基斯……場上一堆青訓出品。而車仔呢,除左泰利之外,呢幾年真係諗唔到邊個青訓出品喺一隊站穩陣腳。

HEA搞青訓

尋日(12月5日)睇經濟日報,睇左梁振英專訪,竟然諗起巴塞車仔呢兩隊波。點解呢?梁振英話如果香港人才不足,要發展經濟就要搞寬鬆啲嘅入境政策,吸引更多人才來香港喎。嗱!輸入外援呢家野,其實我就唔反對,我去睇港超(係!我有睇港超!)都唔會見佢係外援國援就問候佢啦。但係睇返香港自己又有冇真係用心培訓人才呢?當年董生要大搞高等教育迎接乜鬼知識型經濟,點知政府又唔肯駛錢,於是就搞副學士呀、自資院校咁。呢啲課程唔單止成日被人視為次一等,更因為政府唔資助,結果呢一代的同學仔咪十個有七個孭住沉重學債。搞好教育變左製造貧窮,認真威水!

政府鼓勵我地讀多啲書,但又唔信自己體制培訓出來啲人。優才計劃、專才計劃先後推出,又俾大學收更多非本地生等佢地可以留喺香港搵野做,到頭來又係用「人才不足」四個字解釋!咁咪即係車仔囉!培訓人才係HEA做,諗住靠輸入外援撐起香港經濟就算。啲孭住學債又冇好路數啲香港青年人點呢?睇下車仔啲青年軍咪知囉。有個叫麥伊治蘭,四年被借左去五間球會,你估佢第時真係做到一隊正選?仲有,而家打緊東南亞錦標賽,菲律賓國家隊個射手以前咪係車仔青年軍,而家踢菲律賓聯賽呀!唔怪得知梁振英一面話要輸入人才,一面叫香港年青人離開香港發展事業啦。

有錢佬最著數

我地三任特首都走車仔路線,而唔走巴塞路線,其實又好合理。阿巴莫域治用錢買車仔返來咪可以也武也文囉。巴塞會長?喂,民選個喎!我地特首係有錢人選出來,中央任命,就梗係睇實有錢人荷包,唔會喺佢地身上拎錢喺我地嘅教育身上啦!球會買外援就掟錢出去買。香港啲大企業輸入人才其實連轉會費都隨時唔駛俾架!真係人地育成,大企業接收成果!有啲人更係來香港俾十零萬學費讀大學至得以留港搵工,根本就變相等政府唔駛用稅收幫補大學咁多,真係送埋嫁妝俾你香港啲有錢人添呀。所以成個plan對香港啲有錢人真係好SO!

其實有幸喺香港幹一番事業又點呢?忠心球員收山,球會都會幫你搞場告別賽俾退休金你。就算唔留喺球任教,得閒返去主場都被奉為上賓。香港呢?冇全民養老金、安老院舍又不足。今年睇施政報告,話政府要向深圳同肇慶嘅院舍買住俾香港啲老人家住。真係為香港貢獻一世然後再趕你走,認真無良!

點都好,希望梁振英呢個鴻圖大計唔好搞得掂!否則我地唔只變做毫無靈魂的車仔,仲可能變埋德甲惡霸拜仁!HEA搞青訓,去自己啲競爭對手到掠奪晒人地啲人才,豈不是拜仁所為!唉……不過最應該離港發展事業嗰個梁振英家下仲賴死唔走,睇來香港都係會繼續HEA搞青訓,甚至用青訓製造貧窮,咁樣上面班有錢佬咪繼續玩晒!

廣告