文：拖你條命
基層打工仔手停口停，最怕遇上老闆拖糧。
亞視旗下八百幾名員工，已經無糧出成個幾禮拜。間公司做到咁大，數數埋埋，辦公室低層員工、錄影廠道具、服裝、燈光攝影、茶水打雜、清潔……背後一定由好多基層員工支撐，等份糧開飯的基層家庭就慘咯。
點知勞工處施施然咁，見亞視拖咗超過一星期糧，都只係出封信「敦促」亞視高層盡快出糧，十足十長輩「叮囑」小朋友要做功課咁喎。
方向報個報導講到勞工處做左好多野咁，但都係出口水咋喎，咁勞工處實際做過乜？
大拿拿八百幾名員工遭欠薪，唔使查都知啦，仲要唔起訴。最離譜係張建宗，推番個波去亞視員工度，話要有員工舉證先做到嘢（潛台詞即係勞工處管唔著，唔會介入 的意思啦）！大佬，俾著你係打工仔，指證老細唔怕被秋後算帳咩？！再講，勞工處自己都話開咗條熱線，已經收到員工求助電話，咁都唔檢控真係好講唔過去。
至於法例規定老闆唔準時出糧，就要按欠薪計番利息俾僱員：勞工處的「跟進」？咪影都無囉。
話時話，係亞視咁大間公司拖糧，方向報先有興趣報下啫；其實員工被老細拖糧時有發生，又豈止得亞視一間公司？大把打工仔平日辛酸無人知，又唔見方向報去整個調查報告講下依家追糧之苦！