重點提示：
1. 沙田市中心藥品店密度比七仔更誇張，達25間。
2. 當區所有註冊藥房達15間，比七仔多兩倍。
3. 藥行／藥坊／藥店（非註冊藥房）有10間。
4. 連鎖註冊藥房（估計）有9間。
5. 擁有最多藥品店的是沙田廣埸，註冊藥房達5間，藥行／藥坊／藥店有4間。
6. 同樣是沙田廣場，有一條短短通道，那邊就有4間藥房。
今時今日的沙田市中心，相信好多沙田友都搖頭嘆息，我平時返屋企，都係直接穿過就算。八個月前，我曾經提過行書店「要行多幾步路」，今次就講吓另一個極端，就係講到口水都乾嘅藥品店。
眾所周知，沙田市中心，尤其係港鐵沙田站一帶，係大小藥品店的集散地，而家藥品店數量同密度，比七仔重誇張（七仔只有五間）。但當中有幾恐怖，區外人可能感受唔到，所以我特登調查一下，畀大家大開眼界。
－註冊藥房多得驚人－
首先，當然要去政府網站查找一下註冊藥房（「獲授權毒藥銷售商」）名單。只得英文版，同埋要用Ctrl+F方便尋找。
我用咗「SHATIN」去搵，再人肉篩選位於沙田市中心六大商場（即希爾頓中心、偉華中心、新城市廣場、沙田中心、沙田廣埸、好運中心）嘅所有註冊藥房，結果就搵到十五間註冊藥房，數目竟然多過七仔！如果再以商場劃分，最密集嘅竟然唔係新城市廣場，而是隔籬嘅沙田廣埸。
希爾頓中心：1
偉華中心：1
新城市廣場：2
沙田中心：3
沙田廣埸：5
好運中心：3
註冊藥房總數：15
－大部分註冊藥房為連鎖式經營－
十五間當中，有唔少係連鎖式經營，因為嗰區的租金，你懂的。「萬0」同「屈人寺」唔使多講，而其他嘅由唔同集團經營，只要留意藥房名後半部分有「 O/B （集團名） LTD.」再Ctrl+F相關名稱就可以。
當然有啲集團為咗隱藏連鎖式經營嘅事實，就幫唔同位置藥房取唔同名稱，但同時取「字輩」嚟方便辨認；又或者用相同藥房，但唔同公司名。粗略估計，有九間係連鎖式經營，不過廢時幫佢哋做宣傳，就唔開名啦。
－藥行／藥坊／藥店達雙位數－
除咗註冊藥房，重有一啲都係賣西藥嘅藥行、藥坊、藥店（統稱「列載毒藥銷售商」，重包埋所有賣西藥嘅地方，例如便利店同超級市場），即係無「紅十字Rx」標誌嘅舖頭。同樣入政府網搵搵就可以，經人肉篩選，唔要無相關嘅超級市場、保健店，屬於呢類型嘅藥行／藥坊／藥店有十間，部分係 「萬0」同「屈人寺」 。連埋註冊藥房，賣藥品嘅就有廿五間！
希爾頓中心：1
偉華中心：0
新城市廣場：1
沙田中心：3
沙田廣埸：4
好運中心：1
藥行／坊／店總數：10
－沙田廣埸一條通道就有幾間藥房－
你無睇錯，沙田廣埸真係成條藥房街。尤其係，從沙田站那邊過來，經後方通道直行，在太興轉右直達沙田中心嘅方向（圖上藍線），沿途有八間藥品店歡迎大家。嗰邊平日有超多大陸客過嚟掃貨，假日更嚴重，就算求其揀一日去，你都會見到一啲講普通話嘅人，同一堆大喼細喼。
因為通道已經好窄，得三四米闊，再加埋佢哋，已經塞到核爆。响近沙田中心方向出口嘅通道，更有三間註冊藥房，同一間藥坊。附近37號舖（近翠華餐廳）由某藥業經營，雖然主要賣奶粉尿片，唔算係藥品店，但同樣吸引唔少大陸人，有時有大小紙皮箱佔咗一部分通道，唔講地點，你可能以為係上水。故此唔難解釋，點解老字號唯一麵家都要走。
沙田友去藥房，真係話咁快就到！香港人體質差，天氣又凍，容易病，呢個時候有咁多藥房陪伴我哋，提供健康所需之餘，重關顧埋黑心商品受害者，好貼心。阿爺真係用心良苦了～